भारतीय क्रिकेट संघाने २०२४ मध्ये अमेरिकेत होणाऱ्या टी-२० विश्वचषकाची तयारी सुरू केली आहे. २०२३ च्या एकदिवसीय विश्वचषकाच्या अंतिम फेरीत ऑस्ट्रेलियाकडून पराभूत झाल्यानंतर रोहित शर्मा आणि त्याच्या संघाला विजेतेपद मिळवण्याची मोठी संधी आहे. टीम इंडियाने अखेरचा टी-२० विश्वचषक २००७ मध्ये जिंकला होता. २०१३ मध्ये चॅम्पियन्स ट्रॉफी जिंकल्यानंतर भारतीय क्रिकेट संघाला एकही आयसीसी स्पर्धा जिंकता आलेली नाही. त्यामुळे आता भारतीय संघाला टी-२० वर्ल्ड कपमध्ये ११ वर्षांचा दुष्काळ संपवून पुन्हा आयसीसी ट्रॉफी जिंकण्याची संधी आहे.
अमेरिकेत मिळणाऱ्या सुविधांवर टीम इंडिया नाखूश?
भारतीय संघ टी-२० विश्वचषकासाठी अमेरिकेला पोहोचला असून खेळाडूंनी सरावला सुरूवात केली आहे. इतकेच नव्हे तर आणि संघाने खेळाडूंनीही याचे फोटो व्हीडिओही शेअर केले. पण एका रिपोर्टनुसार आता यजमान देश अमेरिकेत सरावासाठी ज्या सुविधा दिल्या जात आहेत यावर भारतीय क्रिकेट संघ खूश नसल्याचे समोर आले आहे. रिपोर्टनुसार, टीम इंडियाला सरावासाठी ज्या प्रकारची खेळपट्टी आणि इतर सुविधा दिल्या जात आहेत, त्या नीट नसल्याचे म्हटले जात आहे. टीम इंडियाने याबाबत चिंता व्यक्त केली आहे.
हेही वाचा – न्यूयॉर्कमध्ये ‘ढगाला लागली कळ…’ भर पावसात रोहित-द्रविडची पळापळ, VIDEO व्हायरल
टीम इंडियाचे मुख्य प्रशिक्षक राहुल द्रविड हे टी-२० विश्वचषक स्पर्धेच्या तयारीसाठी कॅन्टियाग पार्कमध्ये देण्यात आलेल्या सुविधांबाबत इतके नाराज आहेत की त्यांनी याबाबत आयसीसीकडेही धाव घेतली आहे. मात्र, ‘कँटियाग पार्कमधील सराव सुविधांबाबत कोणत्याही संघाकडून कोणतीही तक्रार किंवा चिंता व्यक्त करण्यात आलेली नाही,’ असे आयसीसीचे म्हणणे आहे.
दोन महिने सतत रात्रीच्या वेळेत क्रिकेट खेळल्यानंतर भारतीय क्रिकेट संघाने सकाळच्या सराव सत्रांसह टी-२० विश्वचषकाची तयारी सुरू केली आहे. त्यांचे साखळी फेरीतील सर्व सामने अमेरिकेच्या वेळेनुसार सकाळी साडेदहा वाजता सुरू होणार आहेत. रॉयल चॅलेंजर्स बंगळुरूचा एलिमिनेटरमध्ये पराभवानंतर कोहलीने वैयक्तिक कामासाठी ब्रेक घेतला असून शुक्रवारपर्यंत तो संघात सामील होण्याची शक्यता आहे.
हेही वाचा – मार्क वुडच्या बाऊन्सरवर आझम खानला दिसले तारे, डोळे बंद करून खेळताना विचित्र पद्धतीने झाला आऊट, पाहा VIDEO
भारताच्या कडक उन्हात फ्लडलाइट्सखाली सामने खेळल्यानंतर, खेळाडूंना आता सकाळच्या हवामानाशी जुळवून घ्यावे लागेल जेथे तापमान २५ ते २७ अंश सेल्सिअस दरम्यान असेल आणि आर्द्रता खूपच कमी असेल. या परिस्थितीशी जुळवून घेत संघाला सामने खेळायचे आहेत.
