आयसीसी टी-२० विश्वचषक २०२२ मध्ये, भारत आणि दक्षिण आफ्रिका संघ रविवारी पर्थच्या मैदानावर आमनेसामने येणार आहेत. या सामन्यात सर्वांच्या नजरा पुन्हा एकदा भारतीय रन-मशिन विराट कोहलीवर असतील. कोहली गेल्या दोन सामन्यांत अपराजित राहिला असून तो टीम इंडियाच्या विजयाचा हिरो ठरला आहे.
किंग कोहलीने पाकिस्तानविरुद्ध नाबाद ८२ आणि नेदरलँडविरुद्ध नाबाद ६२ धावांची खेळी केली. दरम्यान, दक्षिण आफ्रिकेचा फलंदाज एडन मार्करामने कोहलीविरुद्ध आपल्या गोलंदाजांनी खास रणनीती आखल्याचे म्हटले आहे. कोहली आणि दक्षिण आफ्रिकेचा वेगवान गोलंदाज यांच्यातील सामना रोमांचक होईल, असे देखील त्याने सांगितले.
शनिवारी पत्रकार परिषदेत एडन मार्करामने सांगितले की, ” सामना रोमांचक होणार आहे. आमच्या वेगवान गोलंदाजांना त्याला (विराट कोहली) गोलंदाजी करायला आवडते. त्याचा फॉर्म परत आला आहे, पण आमचे गोलंदाजही सध्या चांगली कामगिरी करत आहेत.”
तो पुढे म्हणाला, “पर्थमध्ये इतर मैदानांपेक्षा जास्त उसळी आहे. आशा आहे की, आमचे गोलंदाज त्याचा फायदा घेऊ शकतील. जर टॉप ऑर्डरने आक्रमक पद्धतीने फलंदाजी केली, तर रनरेट वाढवण्याची जबाबदारी मधल्या फळीवर येते. मी संघाच्या आवश्यकतेनुसार खेळतो.
विराटने आशिया कपमधून पुनरागमन केले आणि तेव्हापासून त्याने १२ डावांमध्ये ७८.२८ च्या सरासरीने ५४८ धावा केल्या आहेत. फॉर्ममध्ये परतल्यानंतर त्याने नाबाद १२२ धावांसह एक शतक आणि पाच अर्धशतके झळकावली आहेत. मार्कराम पुढे म्हणाला की, माझा संघातील गोलंदाजांवर विश्वास आहे. एनरिक नॉर्टजे आणि कागिसो रबाडासारखे गोलंदाज फलंदाजांसाठी घातक ठरू शकतात.
