T20 World Cup Semifinals PAK vs BAN: T20 विश्वचषकाच्या सुपर १२ च्या अत्यंत महत्त्वपूर्ण सामन्यात पाकिस्तानने बांगलादेश वर ५ गडी राखून विजय मिळवला आहे. यासह पाकिस्तान आता टी २० विश्वचषकाच्या उपांत्य फेरीत दाखल झालेला दुसरा संघ ठरला आहे. बांगलादेशचा कर्णधार शकिब अल हसन याने नाणेफेक जिंकून प्रथम फलंदाजीचा निर्णय घेतला होता,मात्र पाकिस्तानी गोलंदाजांच्या समोर बांगलादेशची फलंदाजांची फळी फार यशस्वी झाली नाही परिणामी अवघ्या १२८ धावांचे टार्गेट पाकिस्तानला पूर्ण करायचे होते. बांगलादेशने २० षटकांत ८ बाद १२७ धावा केल्या होत्या. पाकिस्तानने १८. १ षटकात ५ विकेट गमावत १२८ धावा पूर्ण करत सामना जिंकला.
एकीकडे पाकिस्तानचा विजय झाला असला तरी पाकिस्तानी कर्णधार बाबर आझम मात्र आता ट्विटरवर चांगलाच ट्रोल होत आहे. अनेक क्रिकेटप्रेमींनी पाकिस्तान स्वतःपेक्षा दक्षिण आफ्रिकेच्या योगदानानेच उपांत्य फेरीत जाऊ शकल्याचे म्हंटले आहे. ट्विटरवर सध्या बाबर आझमच्या नेतृत्वाविषयी ट्रोलिंग सुरु असताना अनेकांनी टी २० विश्वचषकात बाबरच्या धावांची आकडेवारीही मांडली आहे. बाबर आझमने यंदाच्या टी २० विश्वचषकात पाच सामन्यांमध्ये अत्यंत वाईट कामगिरी केल्याचे अनेकांनी ट्वीट केले आहे. खाली दिलेली आकडेवारी पाहता या ट्रोलर्सचे म्हणणे योग्य आहे असेच दिसून येत आहे.
बाबर आझम का होत आहे ट्रोल?
बाबर आझमला टी-२० विश्वचषक २०२२ मध्ये पाच सामन्यांमध्ये केवळ ३९ धावा करता आल्या आहे. बाबरचा स्ट्राईक रेट सुद्धा ६१. ९ इतकाच आहे. टी २० विश्वचषकात अत्यंत वाईट सुरुवात झाली होती मात्र सुपर १२ ह्या सामन्यांच्या शेवटाकडे पाकिस्तानचा खेळ सुधारला, दक्षिण आफिकेला हरवल्यावर कदाचित पाकिस्तानी संघाच्या आत्मविश्वासाला बूस्ट मिळाला असावा. आजच्या बांगलादेशच्या पराभवाने व त्याहीपेक्षा नेदरलँडच्या पराक्रमाने पाकिस्तानने सेमीफायनलमध्ये धडक दिली आहे.
