वेस्ट इंडिजच्या प्रशिक्षकपदावरून फिल सिमन्स पायउतार

विंडीज संघ मायदेशी परतल्यावर अपयशाचे परिणाम दिसून यायला सुरुवात झाली. वेस्ट इंडिज क्रिकेट मंडळाने मुख्य प्रशिक्षक सिमन्स यांना पदभार सोडण्यास सांगितले आहे. पुढील महिन्यात ऑस्ट्रेलियाविरुद्ध होणारी कसोटी क्रिकेट सामन्यांची मालिका सिमन्स यांच्यासाठी अखेरची असेल, असे वेस्ट इंडिज क्रिकेट मंडळाने स्पष्ट केले आहे.

वेस्ट इंडिज संघाच्या अपयशी कामगिरीबाबत मुख्य प्रशिक्षक सिमन्स यांनी माफी मागितली आहे. ‘‘हे अपयश निश्चित बोचणारे आहे. अपयशाची जबाबदारी स्वीकारून मी ऑस्ट्रेलियाविरुद्धच्या मालिकेनंतर प्रशिक्षकपदाचा राजीनामा देण्याचा विचार करत होतो. पण, आता विचार करण्याची वेळच राहिलेली नाही. आता ऑस्ट्रेलियाविरुद्ध मी संघाकडून अधिक कामगिरी करून घेण्याचा प्रयत्न करेन,’’ असे सिमन्स यांनी म्हटले आहे.