कसोटी क्रमवारीत ऋषभ पंतची मोठी झेप, धोनीलाही टाकलं मागे

ऑस्ट्रेलियाविरुद्धची कसोटी मालिका भारतीय संघाचा यष्टीरक्षक ऋषभ पंतला चांगलीच फलदायी ठरलेली आहे. 4 कसोटी सामन्यांच्या मालिकेत ऋषभ पंतने सर्वाधिक धावा करणाऱ्या फलंदाजांच्या यादीत दुसरं स्थान पटकावलं. यामुळे पंतचं आयसीसीच्या कसोटी क्रमवारीतलं स्थान सुधारलं असून तो आता 17 व्या स्थानावर पोहचला आहे. 1973 साली माजी यष्टीरक्षक फारुख इंजिनीअर यांनी कसोटी क्रमवारीत 17 वं स्थान पटकावलं होतं, त्यांच्या या कामगिरीशी ऋषभ पंतने बरोबरी केली आहे. याचसोबत पंतने 673 गुणांची कमाई करुन आयसीसी कसोटी क्रमवारीत सर्वाधिक गुण मिळवणारा भारतीय यष्टीरक्षक होण्याचा मान मिळवला आहे. कसोटी क्रिकेटमधून निवृत्ती घेतलेल्या धोनीच्या नावावर 662 गुण जमा होते.