Ranji Trophy : “कोणाकडे गुणवत्ता असेल तर त्याला अधिक…”, टीम इंडियातून दुर्लक्ष केल्याने शार्दुल ठाकूरची संतप्त प्रतिक्रिया

या सामन्यानंतर शार्दुल ठाकुरने अजित आगरकरच्या नेतृत्वाखालील निवड समितीलाही कडक संदेश दिला आहे. बॉर्डर-गावसकर करंडक स्पर्धेसाठी भारतीय कसोटी संघात स्थान न मिळालेल्या ठाकूरने सांगितले की, खेळाडूंमध्ये ‘गुणवत्ता’ असेल तर निवडीसाठी त्यांच्या नावांचा विचार केला पाहिजे. रोहित-जैस्वालसारखे खेळाडू परतल्यानंतरही मुंबई संघाने ४७ धावांत ७ गडी गमावले होते, त्यानंतर शार्दुलने अर्धशतक झळकावत संघाला १२० धावांपर्यंत पोहोचवले. त्याच्या फलंदाजीचे सर्वत्र कौतुक होत आहे.

शार्दुल ठाकूर काय म्हणाला?

पहिल्या दिवसानंतर प्रसारमाध्यमांशी बोलताना शार्दुल ठाकूर म्हणाला, “माझ्या गुणवत्तेबद्दल मी काय सांगू? इतरांनी याविषयी बोलायला हवे. कोणाकडे गुणवत्ता असेल तर त्याला अधिक संधी द्यायला हवीत. मला कठीण परिस्थितीत फलंदाजी करायला आवडते. सोप्या परिस्थितीत, प्रत्येकजण चांगले करतो, परंतु आपण प्रतिकूल परिस्थितीत कशी कामगिरी करतो हे महत्त्वाचे आहे. मी कठीण परिस्थितींकडे आव्हान म्हणून पाहतो आणि त्या आव्हानावर मात कशी करता येईल याचा नेहमी विचार करतो.”

कसोटी संघात स्थान न मिळण्याव्यतिरिक्त, ठाकूरला गेल्या वर्षी नोव्हेंबरमध्ये आयपीएलच्या मेगा लिलावात कोणताही खरेदीदार सापडला नाही, तरीही त्याने कबूल केले की या धक्क्यातून पुढे जाणे महत्त्वाचे आहे. मुंबईने गुरुवारी रणजी करंडकातील एलिट ग्रुप ए सामन्यात जम्मू आणि काश्मीरविरुद्ध पहिल्या डावात आघाडी गमावली. वेगवान गोलंदाजांना अनुकूल विकेटवर नाणेफेक जिंकल्यानंतर फलंदाजी करणे अजिंक्य रहाणेच्या नेतृत्वाखालील संघाला महागात पडले. कारण मुंबईचा डाव अवघ्या १२० धावांत आटोपला आणि प्रत्युत्तरात जम्मू-काश्मीरने पहिल्या दिवशी १७४ धावा केल्या आणि ५४ धावांची आघाडी घेतली.