खेळाशी प्रामाणिक राहा, कोणत्याही स्तरावर चांगली कामगिरी कराल – विराट कोहली

अवश्य वाचा – दिल्लीच्या मैदानावर विराट कोहलीच्या नावाने स्टँड, अनुष्का झाली भावूक

“ज्यावेळी तुम्ही संघाकडून खेळत असता त्यावेळी नेहमी जिंकण्याची जिद्द मनात ठेऊन मैदानात उतरायला हवं. केवळ संघात सहभागी व्हायचंय म्हणून मैदानात उतरलात तर तुमची कामगिरी कधीच सुधारणार नाही. मात्र तुमच्या खेळाशी प्रामाणिक राहिलात तर कोणत्याही स्तरावर चांगला खेळ करु शकता. दिल्लीमध्ये अनेक होतकरु खेळाडू आहेत. त्यांना योग्य मार्गदर्शन केल्यास ते एकदिवस नक्कीच चांगली कामगिरी करु शकतील.” विराट कोहली आपल्या सत्कारानंतर उपस्थित खेळाडूंशी बोलत होता.

विराट कोहलीच्या नेतृत्वाखाली भारतीय संघाने नुकतच वेस्ट इंडिज दौऱ्यावर वर्चस्व राखलं होतं. टी-२०, वन-डे आणि कसोटी मालिकेत भारताने यजमान विंडीजला धोबीपछाड दिला. यानंतर भारतासमोर दक्षिण आफ्रिकेचं आव्हान असणार आहे. १५ सप्टेंबरपासून भारत विरुद्ध दक्षिण आफ्रिका यांच्यातील टी-२० मालिकेला सुरुवात होणार आहे. या मालिकेत भारत ३ टी-२० आणि ३ कसोटी सामने खेळणार आहे.