Shreyanka Patil in Emerging Asia Cup 2023: उदयोन्मुख अष्टपैलू खेळाडू श्रेयंका पाटीलने दोन धावांत पाच विकेट्स घेतल्या. त्यामुळे भारताच्या २३ वर्षांखालील महिला संघाने महिला उदयोन्मुख आशिया चषक स्पर्धेत नवख्या हाँगकाँग संघावर ९ गडी राखून विजय मिळवला. आणि आपल्या मोहिमेची दमदार सुरुवात केली. पहिल्या महिला प्रीमियर लीगमध्ये रॉयल चॅलेंजर्स बंगळुरूसाठी प्रभावी कामगिरी करणाऱ्या २० वर्षीय श्रेयंकाच्या ऑफ-स्पिन गोलंदाजीसमोर हाँगकाँगचा संघ १४ षटकांत अवघ्या ३४ धावा करत गारद झाली.
भारतीय संघाने नाणेफेक जिंकून पाहिले गोलंदाजीचा निर्णय घेतला होता. हाँगकाँगसाठी केवळ एका खेळाडूला दोन आकडी धावसंख्या गाठता आली तर तब्बल ४ खेळाडूना भोपळाही फोडता आला नाही. हाँगकाँगची सलामीवीर मारिको हिलने १९ चेंडूत सर्वाधिक १४ धावा केल्या. अंडर-१९ विश्वचषकात भारताची स्टार खेळाडू डावखुरी फिरकीपटू मन्नत कश्यप (२/२) आणि लेग-स्पिनर पार्श्वी चोप्रा (२/१२) यांनीही प्रत्येकी दोन बळी घेतले.
प्रत्युत्तरात जी त्रिशाच्या नाबाद १९ धावांच्या खेळीमुळे भारताने ५.२ षटकांत ३८ धावा करून लक्ष्य गाठले. भारताची कर्णधार श्वेता सेहरावतला फारशी चमक दाखवता आली नाही. बेट्टी चानने तिला बाद केला. या सामन्यात श्रेयंकाला तिच्या शानदार कामगिरीसाठी सामनावीराच्या पुरस्काराने गौरविण्यात आले. भारतीय महिला अ संघ या स्पर्धेतील आपला पुढचा सामना १५ जून रोजी नेपाळ अ संघाविरुद्ध खेळेल.
विराट कोहलीला पाहून श्रेयंकाने क्रिकेट खेळायला सुरुवात केली
इमर्जिंग प्लेअर किंवा युवा महिला खेळाडू म्हणून उदयास आलेली श्रेयंका पाटीलने आशिया चषक स्पर्धेत अवघ्या ३ षटकात २ धावा देऊन ५ विकेट घेत मोठा विक्रम केला होता. २० वर्षीय श्रेयंका पाटीलने आपल्या मुलाखतीत म्हटले होते की, “विराट कोहलीला पाहिल्यानंतर तिने क्रिकेट खेळण्यास सुरुवात केली, मी किंग कोहलीच्या खेळीने खूप प्रभावित झाली होती.” विराट कोहलीला देवासारखा मानणाऱ्या श्रेयंका पाटीलने आपल्या करिअरची सुरुवात वेगवान गोलंदाज म्हणून केली होती, पण आता ती ऑफ-स्पिन गोलंदाज आहे. महिला आयपीएलच्या पहिल्या आवृत्तीत श्रेयंकाला रॉयल चॅलेंजर्स बंगळुरू (RCB) महिला संघाकडून खेळण्याची संधी मिळाली. श्रेयंकाने ७ सामन्यात ६ विकेट्स घेतल्या. १७ धावांत २ विकेट्स ही तिची सर्वोत्तम कामगिरी होती.
