Pakistan Team on PCB: बाबर आझमचा संघ आणि पाकिस्तान क्रिकेट बोर्ड (पीसीबी) यांच्यात करारावरून वाद वाढत आहेत. पीसीबीने अलीकडेच खेळाडूंचे मानधन वाढवण्याचा निर्णय घेतला होता, परंतु बाबर आणि त्याचे सहकारी नवीन करारावर स्वाक्षरी करण्यास तयार नाहीत. खरंच, खेळाडूंच्या परवानाधारक डिजिटल अधिकारांच्या विक्रीवर मतभेद झाल्यानंतर पाकिस्तानी क्रिकेटपटू पीसीबीसोबत दीर्घकालीन केंद्रीय करारावर सही करण्यास तयार नाहीत. खेळाडूंच्या केंद्रीय कराराचा शेवटचा दिवस हा ३० जून रोजी संपला, परंतु पीसीबीने त्यांना नवीन करारावर स्वाक्षरी करण्यास अद्याप राजी केलेले नाही. खेळाडूंच्या जवळच्या एका विश्वासार्ह सूत्राने सांगितले की, “खेळाडूंच्या मोठ्या भागिदारीच्या मागणीवरून आणि बोर्डाद्वारे नियंत्रित त्यांच्या डिजिटल अधिकारांच्या विक्रीवरून हा वाद पेटला आहे. खेळाडूंचे असे मत आहे की, इतर क्रिकेट मंडळे एकतर खेळाडूंचे डिजिटल अधिकार/NFTs (नॉन-फंगीबल टोकन) विकण्यात कुठलाही हस्तक्षेप करत नाहीत किंवा त्यांच्यात योग्य करार झालेले आहेत. सिंगापूरस्थित दोन भारतीयांच्या नेतृत्वाखालील रारियो किंवा ड्रीम स्पोर्ट्स सारख्या कंपन्या, खेळाडूंचे चित्र, व्हिडीओ आणि साउंड बाइट्ससह स्पोर्ट्स NFT विकून चांगले पैसे देत आहेत. खेळाडूंना बोर्डाने त्यांना मोफत वाटाघाटीचे अधिकार द्यावेत किंवा कमाईचा मोठा हिस्सा द्यावा अशी त्यांची इच्छा होती.” हेही वाचा: Asia Cup 2023: आशिया कपसाठी भारतीय संघाची दिल्लीत होणार निवड! कर्णधार रोहित शर्मा बैठकीला उपस्थित राहणार? डिजिटल अधिकारांच्या विक्रीतून मिळणाऱ्या कमाईवरून वाद पीसीबीला आयसीसी आणि आशियाई क्रिकेट कौन्सिल (ACC) कडून खेळाडूंच्या प्रतिमा, व्हिडीओ आणि साउंड बाइट्सचे डिजिटल/ऑनलाइन अधिकार प्रदान करण्यासाठी महसूल प्राप्त होतो. पाकिस्तान सुपर लीग (पीएसएल) खेळाडूंच्या डिजिटल अधिकारांच्या विक्रीतूनही पीसीबी कमाई करत असल्याचे सांगितले जात आहे. "पीसीबी खेळाडूंना त्यांच्या डिजिटल अधिकारांच्या विक्रीतून वाटा देते परंतु खेळाडूंना वाटते की ते पुरेसे नाही," असे सूत्रांनी सांगितले. स्पोर्ट्स NFTsची विक्री क्रिप्टोकरन्सी मार्केटमध्ये कमाईचा एक प्रमुख स्रोत बनली आहे, रारियो (Rario) ने अलीकडे सुमारे $१२० दशलक्ष (अंदाजे रु. ९९७ कोटी) गुंतवणूक केली आहे. सूत्राने सांगितले की, पीसीबीने या खेळाडूंसाठी तीन वर्षांच्या केंद्रीय कराराचा प्रस्ताव ठेवला होता, परंतु ते अद्याप प्रत्यक्षात आलेले नाहीत. सध्या पीसीबीचे वरिष्ठ अधिकारी श्रीलंकेत असून बाबर आझमसह इतर अनेक खेळाडूंशी चर्चा करत आहेत. हेही वाचा: Shoaib Akhtar: “भारतातून येणाऱ्या पैशावर…” शोएब अख्तरच्या वक्तव्याने पाकिस्तान क्रिकेटमध्ये उडाली खळबळ पगारात विक्रमी वाढ झाली नुकतेच पीसीबीने खेळाडूंचे मानधन वाढवण्याचा निर्णय घेतला होता. क्रिकेट पाकिस्तानमधील वृत्तानुसार, कर्णधार बाबर आझम, मोहम्मद रिझवान आणि शाहीन शाह आफ्रिदीसह सर्व फॉरमॅटमधील खेळाडूंना मासिक रिटेनरशिप फी म्हणून PKR ४.५ दशलक्ष (अंदाजे रु. १३.२२ लाख) देऊ केले आहेत. पूर्वीच्या केंद्रीय करारांबद्दल, कसोटी खेळणाऱ्या खेळाडूंना दरमहा PKR १.१ दशलक्ष (सुमारे ३.२ लाख रुपये) मिळायचे. तर, मर्यादित षटकांच्या खेळाडूंना ०.९५ दशलक्ष PKR (सुमारे २.८ लाख रुपये) मिळत असे.
