IND vs AUS Yashasvi Jaiswal and Mitchell Starc Video : बॉर्डर गावस्कर ट्रॉफीतील चौथी कसोटी एमसीजी येथे खेळवली जात आहे. पाचव्या दिवशी या सामन्याची उत्सुकता शिगेला पोहोचली आहे. या सामन्यात ऑस्ट्रेलियाने भारताला ३४० धावांचे लक्ष्य दिले आहे. दोन्ही संघ विजयासाठी मैदानात घाम गाळत आहेत. दोन्ही संघ आपापल्या परीने प्रयत्न करत आहेत. दरम्यान, मिचेल स्टार्क आणि यशस्वी जैस्वाल यांच्यातील मजेशीर व्हिडीओ सोशल मीडियावर व्हायरल होत आहे.
वास्तविक, ऋषभ पंतला चेंडू टाकल्यानंतर मिचेल स्टार्क पुन्हा रनअपसाठी जात होता. जाता-जात, त्याने नॉन-स्ट्रायकर एंड असलेल्या बेल्स उचलल्या आणि त्या बदलून पुन्हा ठेवल्या. यानंतर यशस्वी जैस्वालनेही त्याला चोख प्रत्युत्तर दिले. नॉन स्ट्राईक एंडला उभ्या असलेल्या लगेच स्टंप जवळ गेला आणि मिचेल स्टार्कने बदलल्या बेल्स पुन्हा होत्या तशा ठेवल्या. त्याच्या या कृतीने सर्वांचे लक्ष वेधले, ज्याचा व्हिडीओ आता तुफान व्हायरल होत आहे.
स्टार्क-जैस्वालचा व्हिडीओ व्हायरल –
यशस्वी जैस्वालने बदलल्या बेल्स पुन्हा होत्या तशा ठेवल्यानंतर मिचेल स्टार्कला एक प्रश्न विचारला. मिचेल स्टार्कने यशस्वीला विचारले, ‘तुझा अंधश्रद्धेवर विश्वास आहे का?’ याला उत्तर देताना जैयस्वाल म्हणाला, ‘मला फक्त माझ्यावर विश्वास आहे.’ जैस्वाल आणि स्टार्क यांच्यात पर्थमध्ये खेळल्या गेलेल्या पहिल्या कसोटीपासून लढाई सुरू आहे. त्या सामन्यापासून दोघांमध्ये शीतयुद्ध सुरू आहे.
भारतीय संघाच्या दुसऱ्या डावाची सुरुवात अत्यंत खराब झाली. संघाने अवघ्या ३३ धावांवर तीन विकेट्स गमावल्या. रोहित नऊ धावा आणि कोहली पाच धावा करून बाद झाला. केएल राहुल खातेही उघडू शकला नाही. यानंतर यशस्वीने आणखी पडझड होऊ न देता संघाचा डाव सावरताना कसोटी कारकीर्दीतील दहावे अर्धशतक झळकावले. त्याचबरोबर आतापर्यंत त्याने ऋषभ पंतसोबत ५३ धावांची भागीदारी केली आहे. आज अजून ५२ षटकांचा खेळ बाकी असून भारताने तीन गड्यांच्या मोबदल्यात ८६ धावा केल्या आहेत. भारताला विजयासाठी अजून २५४ धावांची गरज आहे.
© IE Online Media Services (P) Ltd