Gautam Gambhir has suddenly returned home after IND vs AUS 1st Test : भारत आणि ऑस्ट्रेलिया संघांत सध्या पाच कसोटी सामन्यांची बॉर्डर गावस्कर ट्रॉफी खेळवली जात आहे. या मालिकेतील पहिला सामना पर्थ येथे खेळला गेला, ज्यामध्ये भारतीय संघाने २९५ धावांनी ऐतिहासिक विजय मिळवला. यानंतर भारतीय संघासाठी चिंतेची बातमी समोर आली आहे. पहिल्या कसोटी सामन्यानंतर संघाचा मुख्य प्रशिक्षक गौतम गंभीर कुटुंबासह मायदेशी परतला आहे. गौतम गंभीर वैयक्तिक कारणांमुळे माघारी परतला आहे.
ग
आता गौतम गंभीर कॅनबेरा येथे ३० नोव्हेंबरपासून सुरू होणाऱ्या दोन दिवसीय गुलाबी चेंडूच्या सराव सामन्यात तो उपस्थित राहण्याची शक्यता नाही. तथापि, ६ डिसेंबरपासून सुरू होणाऱ्या गुलाबी चेंडू कसोटीपूर्वी गंभीर अॅडलेडमध्ये थेट संघात सामील होण्याची अपेक्षा आहे. भारतीय संघ बुधवार, २७ नोव्हेंबर रोजी कॅनबेराला रवाना होईल, जिथे संपूर्ण संघ ऑस्ट्रेलियाचे पंतप्रधान अँथनी अल्बानी यांच्या सन्मानार्थ आयोजित केलेल्या अधिकृत स्वागत समारंभात उपस्थित राहण्याची अपेक्षा आहे.
गौतम गंभीर अचानक मायदेशी का परतला?
बीसीसीआयच्या एका सूत्राने मंगळवारी टाईम्स ऑफ इंडियाला सांगितले की, “होय, गौतम गंभीर वैयक्तिक आणीबाणीमुळे तो भारतात परतला आहे. त्याच्या कुटुंबातील एका सदस्याला आरोग्याची समस्या निर्माण झाली आहे. माात्र, तो ॲडलेडमध्ये होणाऱ्या कसोटी सामन्यापूर्वी परतण्याची शक्यता आहे.” दुसऱ्या कसोटीच्या (गुलाबी चेंडू) तीन दिवस आधी तो ३ डिसेंबरला ऑस्ट्रेलियाला परतेल.
दोन दिवसीय गुलाबी चेंडूच्या सामन्यामुळे भारतीय संघाला सराव करण्याची संधी मिळणार आहे. पंतप्रधान इलेव्हनमध्ये युवा खेळाडूंचा भरणा आहे, पण वेगवान गोलंदाज स्कॉट बोलंड खेळण्याची अपेक्षा आहे. त्यामुळे भारताचा या सामन्यात चांगला सराव होण्याची शक्यता आहे. खेळाचे नियम दोन्ही संघ ठरवतील आणि सर्व खेळाडू फलंदाजी आणि गोलंदाजी करतील अशी अपेक्षा आहे, कारण त्याला अधिकृत दर्जा दिला जाणार नाही.
© IE Online Media Services (P) Ltd