Usman Khawaja’s Indian Visa Issue: भारत आणि ऑस्ट्रेलिया यांच्यातील कसोटी मालिकेसाठी कांगारूंचा संघ भारतात दाखल झाला आहे. पॅट कमिन्सच्या नेतृत्वाखाली ऑस्ट्रेलियन संघ भारतीय भूमीवर चार कसोटी सामने खेळणार आहे. बॉर्डर गावस्कर ट्रॉफीची पहिली कसोटी ९ फेब्रुवारीपासून सुरू होणार आहे. जागतिक कसोटी चॅम्पियनशिपच्या दृष्टीने ही मालिका खूप महत्त्वाची आहे. याच कारणामुळे ऑस्ट्रेलियन संघ जवळपास आठवडाभरापूर्वीच भारतात पोहोचला आहे. मात्र, संघाचा सलामीवीर उस्मान ख्वाजा सध्या भारतात आलेला नाही. उस्मान ख्वाजाला व्हिसा मिळू शकला नाही. यामुळे तो संघासोबत भारतात आलेला नाही.
ऑस्ट्रेलियन संघातील खेळाडू आणि कर्मचारी बुधवारी सिडनीहून भारताकडे रवाना झाले. यानंतर उस्मान ख्वाजाने सोशल मीडियावर लिहिले, “मी भारतासाठी माझ्या व्हिसाची वाट पाहत आहे, जसे की…” यासोबतच ख्वाजा यांनी चित्रपटाचा एक फोटो शेअर केला आहे, ज्यामध्ये अभिनेता झूल्यावर वाट पाहत आहे. हा फोटो सोशल मीडियावर मीम म्हणून खूप लोकप्रिय आहे.
ऑस्ट्रेलियन खेळाडूंना व्हिसा मिळण्यास बराच विलंब झाला आहे. तथापि, ख्वाजाशिवाय अन्य कोणत्याही खेळाडूला व्हिसाच्या समस्येमुळे भारतात येण्यास विलंब झाला आहे का, हे अद्याप स्पष्ट झालेले नाही. मीडिया रिपोर्ट्सनुसार, ख्वाजा आता गुरुवारी बेंगळुरूला जाणार्‍या विमानात बसून ऑस्ट्रेलियन संघात सामील होतील.
सोमवारी रात्री सिडनीमध्ये क्रिकेट ऑस्ट्रेलियाच्या पुरस्कारांची घोषणा झाल्यानंतर ऑस्ट्रेलियन कसोटी संघ मंगळवार आणि बुधवारी दोन गटात रवाना झाला. क्रिकेट ऑस्ट्रेलिया अवॉर्ड्समध्ये ख्वाजाला शेन वॉर्न पुरुष कसोटीपटू म्हणून घोषित करण्यात आले. ख्वाजाचा जन्म पाकिस्तानमध्ये झाला असून तो आता ऑस्ट्रेलियाकडून क्रिकेट खेळतो. त्याने २०१३ आणि २०१७ मध्ये ऑस्ट्रेलियन कसोटी संघासह अनेक वेळा भारताचा दौरा केला आहे. त्याला आधी व्हिसा मिळण्यात अडचणी येत होत्या.
२०११ मध्ये त्याला न्यू साउथ वेल्ससाठी टी२० चॅम्पियन्स लीगमध्ये खेळण्यासाठी व्हिसा नाकारण्यात आला होता. ख्वाजा भारतात भलेही कसोटी खेळला नसेल, पण तो ऑस्ट्रेलियन संघातील महत्त्वाचा खेळाडू आहे. २०२२ च्या सुरुवातीला इंग्लंड विरुद्ध पुनरागमन केल्यापासून, त्याने ७९.६८ च्या सरासरीने १२७५ धावा केल्या आहेत, ज्यात पाच शतकांचा समावेश आहे. ऑस्ट्रेलियन संघ ९ फेब्रुवारीपासून सुरू होणाऱ्या पहिल्या कसोटीसाठी नागपूरला जाण्यापूर्वी बेंगळुरूमध्ये चार दिवस तयारी करेल.
ऑस्ट्रेलियन संघाने भारतात रवाना होण्यापूर्वी सिडनीतील फिरकी खेळपट्टीवर सराव केला. तथापि, ख्वाजासह बिग बॅश लीगमध्ये खेळणारे फलंदाज त्यात सहभागी नव्हते. ऑस्ट्रेलियन संघाने या दौऱ्यापूर्वी सराव सामने खेळण्याऐवजी नेटमध्ये सराव करण्याचा निर्णय घेतला आहे. ऑस्ट्रेलियन खेळाडू बेंगळुरूमधील फिरकी खेळपट्टीवर सराव करून कसोटीची तयारी करतील.
