विराट कोहलीच्या अनुपस्थितीत भारतीय संघाचं नेतृत्व करण्याची संधी मिळालेल्या रोहित शर्माने अनोखा विक्रम केला आहे. भारताकडून १०० आंतरराष्ट्रीय सामने खेळणारा रोहित पहिला खेळाडू ठरला आहे. बांगलादेशविरुद्ध बडोद्याच्या मैदानातला दुसरा टी-२० सामना रोहितच्या टी-२० कारकिर्दीतला शंभरावा सामना ठरला आहे. रोहितने पाकिस्तानचा माजी आक्रमक फलंदाज शाहिद आफ्रिदीचा ९९ सामन्यांचा विक्रम मोडला आहे. सर्वाधिक आंतरराष्ट्रीय टी-२० सामने खेळणाऱ्यांच्या यादीत रोहितचा अपवाद वगळता धोनी हा एकमेव भारतीय खेळाडू आहे. धोनीने आतापर्यंत ९८ आंतरराष्ट्रीय टी-२० सामने खेळले आहेत. या यादीमध्ये पाकिस्तानचा शोएब मलिक रोहितच्या पुढे आहे, त्याने आतापर्यंत १११ टी-२० सामने खेळले आहेत.

दिल्ली येथे झालेल्या पहिल्या टी-२० सामन्यात बांगलादेशकडून भारताला पराभव सहन करावा लागला होता. या सामन्यात भारतीय संघाची कामगिरी निराशाजनक राहिली होती, यानंतर बदलाचे संकेत देऊनही रोहित शर्माने दुसऱ्या टी-२० सामन्यात भारतीय संघामध्ये बदल केले नाही.