IND vs BAN Highlights: केएल राहुलने बांगलादेशविरुद्ध ठोकला विजयी षटकार! शुबमन गिलने ICC स्पर्धेत झळकावलं पहिलंवहिलं शतक

शुभमन गिलच्या आयसीसी स्पर्धेतील पहिल्यावहिल्या शतकाच्या जोरावर चॅम्पियन्स ट्रॉफीच्या पहिल्या सामन्यात भारताने बांगलादेशचा सहा विकेट्सने पराभव केला. केएल राहुलने विजयी षटकार मारत भारताच्या विजयावर शिक्कामोर्तब केला. तत्पूर्वी मोहम्मद शमीच्या नेतृत्वाखाली भारतीय गोलंदाजांनी शानदार कामगिरी करत बांगलादेशला ४९.४ षटकांत २२८ धावांवर रोखले. प्रत्युत्तरात, गिलच्या १२९ चेंडूत नऊ चौकार आणि दोन षटकारांच्या मदतीने नाबाद १०१ धावांच्या खेळीमुळे भारताने ४६.३ षटकांत चार गडी गमावून २३१ धावा करून सामना जिंकला. अशाप्रकारे भारतीय संघाने चॅम्पियन्स ट्रॉफीमधील आपल्या मोहिमेची सुरुवात विजयाने केली.

https://twitter.com/BCCI/status/1892611947469717708

लक्ष्याचा पाठलाग करताना कर्णधार रोहित शर्मा आणि गिलने भारताला चांगली सुरुवात करून दिली, परंतु रोहित ४१ धावा करून बाद झाला. यानंतर संघाने विराट कोहली, श्रेयस अय्यर आणि अक्षर पटेल यांच्या विकेट गमावल्या. कोहलीने २२ धावा, श्रेयसने १५ आणि अक्षरने आठ धावा केल्या. यानंतर, केएल राहुलने गिलसोबत पाचव्या विकेटसाठी ८७ धावांची नाबाद भागीदारी केली. केएल राहुलने ४७ चेंडूत एक चौकार आणि दोन षटकारांसह ४१ धावा काढल्या आणि नाबाद राहिला. बांगलादेशकडून रिशाद हुसेनने दोन तर तस्किन अहमद आणि मुस्तफिजूर रहमानने प्रत्येकी एक विकेट घेतली.

तत्पूर्वी, बांगलादेशने तौहीद हृदयॉयच्या शतक आणि झाकीर अलीच्या अर्धशतकाच्या जोरावर भारतासमोर विजयासाठी २२९ धावांचे लक्ष्य ठेवले होते. नाणेफेक जिंकून प्रथम फलंदाजी करताना, बांगलादेशची परिस्थिती एकेकाळी वाईट होती आणि त्यांनी फक्त ३५ धावांमध्ये पाच विकेट्स गमावल्या होत्या, परंतु झाकीर आणि हृदयॉय यांनी एक शानदार भागीदारी करून बांगलादेशचा डाव सावरला. या दोघांच्या भागीदारीमुळे बांगलादेशला ४९.४ षटकांत २२८ धावा करता आल्या. ११८ चेंडूत सहा चौकार आणि दोन षटकारांच्या मदतीने १०० धावा काढल्यानंतर हृदयॉय पॅव्हेलियनमध्ये परतला.

भारताकडून मोहम्मद शमीच्या नेतृत्वाखालील गोलंदाजांनी शानदार कामगिरी केली. शमीने सामन्यात पाच विकेट्स घेतल्या, तर हर्षित राणाने तीन आणि फिरकीपटू अक्षर पटेलने दोन विकेट्स घेतल्या. या दरम्यान शमीने एकदिवसीय सामन्यांमध्ये २०० विकेट्स पूर्ण केले. बांगलादेशकडून तौहीद व्यतिरिक्त झाकीरने ११४ चेंडूत चार चौकारांसह ६८ धावा केल्या. तौहीद आणि हृदयॉय वगळता बांगलादेशच्या इतर कोणत्याही फलंदाजाला चांगली कामगिरी करता आली नाही. त्यांच्या चार फलंदाजांना त्यांचे खातेही उघडता आले नाही, तर तीन खेळाडूंना दुहेरी आकडा गाठता आला नाही. तन्जीद हसनने २५ आणि रिशाद हुसेनने १८ धावांचे योगदान दिले.

भारतीय कर्णधार रोहित शर्मा चांगली खेळी केल्यानंतर बाद झाला आहे. रोहित आणि शुबमन गिल यांनी भारताला चांगली सुरुवात करून दिली. या काळात रोहितने एकदिवसीय सामन्यांमध्ये ११००० धावा पूर्ण केल्या. रोहित अर्धशतकाकडे वाटचाल करत होता पण मोठा शॉट खेळण्याच्या प्रयत्नात त्याने आपली विकेट गमावली. रोहित ३६ चेंडूत सात चौकारांसह ४१ धावा काढून बाद झाला. भारताने १० षटकांत एका विकेटच्या मोबदल्यात ६९ धावा केल्या आहेत.

बांगलादेशची आठवी विकेट गेली

बांगलादेशची आठवी विकेट २१५ धावांवर पडली आहे. मोहम्मद शमीने तंजीम हसन शाकिबला शून्यावर पॅव्हेलियनमध्ये पाठवले. शमीचे हे चौथे यश आहे. दुसऱ्या बाजूला, तौहीद हृदयॉय शतकाच्या जवळ आहे. तो ९१ धावांवर खेळत आहे.