IND vs BAN Ashwin became first bowler take 50 Wickets in 3 WTC Season : भारतीय संघाचा स्टार फिरकीपटू रविचंद्रन अश्विनने जागतिक कसोटी चॅम्पियनशिपच्या आतापर्यंतच्या तिन्ही हंगामात वर्चस्व गाजवले आहे. कानपूरच्या मैदानावर बांगलादेशविरुद्ध खेळल्या जात असलेल्या कसोटी मालिकेतील दुसऱ्या आणि शेवटच्या सामन्याच्या चौथ्या दिवशी अश्विनने आणखी एक मोठा पराक्रम केला. बांगलादेश संघाच्या पहिल्या डावात जेव्हा त्याने शकीब अल हसनला बाद केले, तेव्हा आणखी एका मोठ्या विक्रमाला गवसणी घातली.
जागतिक कसोटी चॅम्पियनशिपच्या तिन्ही हंगामातील अश्विनची आतापर्यंतची कामगिरी –
अश्विन जागतिक कसोटी चॅम्पियनशिपच्या इतिहासातील पहिला गोलंदाज ठरला, ज्याने तिन्ही हंगामात ५० किंवा त्याहून अधिक विकेट्स घेतल्या आहेत. या हंगामात अश्विनने आतापर्यंत ५२ विकेट्स घेतल्या आहेत. त्याने जागतिक कसोटी चॅम्पियनशिपच्या पहिल्या हंगामापासून तिसऱ्या चक्रापर्यंत गोलंदाजीत उत्कृष्ट कामगिरी केली आहे. अश्विनने २०१९ ते २०२१ या कालावधीत खेळल्या गेलेल्या जागतिक कसोटी चॅम्पियनशिपच्या पहिल्या हंगाामात १४ सामने खेळले आणि ७१ विकेट्स घेण्यात यश मिळवले.
यानंतर २०२१ ते २०२३ या कालावधीत खेळल्या गेलेल्या जागतिक कसोटी चॅम्पियनशिपच्या दुसऱ्या हंगामात अश्विनने १३ सामने खेळताना एकूण ६१ विकेट्स घेतल्या. जागतिक कसोटी चॅम्पियनशिपच्या तिसऱ्या हंगामात आतापर्यंत अश्विनने १० सामने खेळून ५२ विकेट घेतल्या आहेत, ज्यात आणखी वाढ होण्याची खात्री आहे. याशिवाय अश्विनने वर्ल्ड टेस्ट चॅम्पियनशिपच्या तिन्ही हंगामात एकूण १८४ विकेट्स घेतल्या आहेत, ज्यामध्ये त्याला नॅथन लॉयनच्या पुढे जाण्याची मोठी संधी आहे, ज्यासाठी अश्विनला आणखी फक्त ४ विकेट्स घ्यायच्या आहेत.
हेही वाचा – IND vs BAN : आकाश दीपने विराटच्या बॅटने ठोकले २ गगनचुंबी षटकार, कोहली-रोहितसह गंभीरही चकित, पाहा VIDEO
अश्विन उजव्या आणि डाव्या हाताच्या दोन्ही फलंदाजांविरुद्ध प्रभावी –
आतापर्यंत अश्विनने कसोटी क्रिकेटमध्ये एकूण १०२ सामने खेळताना ५२६ विकेट्स घेतल्या आहेत, ज्यामध्ये त्याने १९१ डावांमध्ये २६३ वेळा उजव्या हाताच्या फलंदाजांना बाद केले आहे. तसेच त्याने डाव्या हाताच्या फलंदाजांनही २६३ वेळा बाद केले आहे. अश्विनची आतापर्यंत कसोटी क्रिकेटमध्ये उजव्या हाताच्या फलंदाजांविरुद्ध १९.३ ची सरासरी राहिला आहे, तर त्याने डाव्या हाताच्या फलंदाजांविरुद्ध २७.९ च्या सरासरीने विकेट्स घेतल्या आहेत. कसोटी क्रिकेटच्या इतिहासात डावखुऱ्या खेळाडूंना बाद करण्यात अश्विन आघाडीवर आहे.
