इंग्लंड आणि भारत यांच्यातील पाचवा कसोटी सामना आजपासून (१ जुलै) एजबस्टन येथे होत आहे. या कसोटीदरम्यान ब्रॉडकास्टर एक अनोखा प्रयोग करण्याची तयारी करत आहेत. शॉर्ट लेगवर क्षेत्ररक्षण करताना इंग्लंडचा खेळाडू ओली पोपच्या हेल्मेटवर कॅमेरा लावला जाणार आहे. या प्रयोगाला आंतरराष्ट्रीय क्रिकेट परिषद (आयसीसी) आणि इंग्लंड क्रिकेट बोर्ड (ईसीबी) यांनी मान्यता दिली आहे.
एजबस्टन कसोटी सामन्यासाठी स्काय स्पोर्ट्स अधिकृत प्रसारक आहे. या सामन्यात प्रेक्षकांना वेगळा अनुभव देण्याचा प्रयत्न केला जाणार आहे. त्यामुळे शॉर्ट लेगवर क्षेत्ररक्षण करणाऱ्या खेळाडूच्या हेल्मेटवर कॅमेरा लावला जाणार आहे. या ठिकाणी ओली पोप क्षेत्ररक्षण करत असतो. या कॅमेऱ्यात आवाज कैद होणार नाही. स्कायने यापूर्वी गेल्या वर्षी ‘द हंड्रेड’च्या पहिल्या हंगामामध्ये असाच प्रयोग केला होता. यष्टिरक्षक फलंदाज टॉम मूर्सने हेल्मेटवर कॅमेरा लावला होता.
क्रिकबजने दिलेल्या वृत्तानुसार एजबस्टनच्या मैदानावर गुरुवारी (३० जून) इंग्लंड संघाच्या नेट सरावावेळी याची चाचणी करण्यात आली. बिग बॅश लीगमध्येही असा प्रयत्न झाला होता. तेव्हा फलंदाजांच्या हेल्मेटवर कॅमेरे बसवण्यात आले होते.