Sarfaraz Khan : सर्फराझने पहिल्याच शतकासह घडवला इतिहास, १९९६ नंतर ‘हा’ खास विक्रम नोंदवणारा ठरला पहिलाच भारतीय

सर्फराझने उत्तम कामगिरी केली –

वास्तविक, पहिल्या डावात शून्यावर बाद झाल्यानंतर दुसऱ्या डावात १५० धावा करणारा सर्फराझ हा तिसरा भारतीय फलंदाज ठरला आहे. सर्फराझच्या आधी नयन मोंगियाने १९९६ मध्ये ऑस्ट्रेलियाविरुद्ध ही अनोखी कामगिरी केली होती. त्याच वेळी, १९५३ मध्ये माधव आपटेने वेस्ट इंडिजविरुद्ध पहिल्या डावात शून्यावर बाद झाल्यानंतर दुसऱ्या डावात १६३ धावांची नाबाद खेळी केली होती. उजव्या हाताचा फलंदाज सर्फराझने आपल्या खेळीत १८ चौकार आणि ३ गगनचुंबी षटकार ठोकले. सर्फराझने सुरुवातीपासूनच आक्रमक फलंदाजी करत अवघ्या ४२ चेंडूत आपले अर्धशतक पूर्ण केले. कसोटीच्या चौथ्या दिवशी सर्फराझने आपली उत्कृष्ट फलंदाजी सुरू ठेवत ११० चेंडूत पहिले कसोटी शतक झळकावले.

एकाच कसोटीत शून्यावर बाद होणारे आणि दीड शतक झळकावणारे फलंदाज –

० आणि १६३* – माधव आपटे विरुद्ध वेस्ट इंडिज, पोर्ट ऑफ स्पेन, १९५३
१५२ आणि ० – नयन मोंगिया विरुद्ध ऑस्ट्रेलिया, दिल्ली, १९९६
० आणि १५० – सर्फराझ खान विरुद्ध न्यूझीलंड, बंगळुरू, २०२४

हेही वाचा – Rishabh Pant : ऋषभ पंत ठरला दुर्दैवी! अवघ्या एका धावेने हुकले ऐतिहासिक कसोटी शतक; स्टेडियमसह ड्रेसिंग रूममध्ये पसरली भयाण शांतता

भारतीय फलंदाजांचा मोठा पराक्रम –

सर्फराझ-पंतच्या उत्कृष्ट भागीदारीमुळे न्यूझीलंडने घेतलेली ३५६ धावांची आघाडी दूर करण्यात टीम इंडियाला यश आले. आपल्याच मातीत खेळत भारतीय संघाने दुसऱ्या क्रमांकाची सर्वोच्च धावसंख्या करत विरोधी संघाने घेतलेली आघाडी मोडून काढली. १९८५ मध्ये इंग्लंडने पहिल्या डावात ३८० धावांची आघाडी घेतली होती, जी भारताच्या फलंदाजांना संपवण्यात यश आले होते.

कोहली-पंतसोबत साकारली महत्त्वाची भागीदारी –

बंगळुरु कसोटीच्या तिसऱ्या दिवशी विराट कोहलीसह सर्फराझ खानने भारतीय डाव शानदारपणे हाताळला. कोहलीसह उजव्या त्याने तिसऱ्या विकेटसाठी १३६ धावांची भागीदारी केली. कोहली बाद झाल्यानंतर सर्फराझने ऋषभ पंतसह चौथ्याला दिवसाच्या खेळाला सुरुवात करताना दमदार फटकेबाजी केली. या दोघांनी चौथ्या विकेटसाठी शानदार फलंदाजी करत १७७ धावांची भागीदारी केली.

हेही वाचा – Sarfaraz Khan : ‘…सूरज अपने ही समय पर निकलेगा’, सर्फराझच्या वडिलांचे शब्द ठरले खरे, डेव्हिड वॉर्नरच्या पोस्टने जिंकली मनं

ऋषभ पंतनेही खूप फटकेबाजी केली आणि १०५ चेंडूत ९९ धावांची दमदार खेळी साकारली. पंतने आपल्या खेळीत ९ चौकार आणि ५ षटकार मारले. याआधी विराट कोहलीनेही चांगली फलंदाजी करत ७० धावांची महत्त्वपूर्ण खेळी केली, तर कर्णधार रोहित शर्माने ५२ धावांचे योगदान दिले. त्यामुळे भारतीय संघाला दुसऱ्या डावात ४६२ धावा करता आल्या. न्यूझीलंडसाठी विल्यम ओ रुक आणि मॅट हेन्री यांनी प्रत्येकी तीन गडी बाद केले. त्याचबरोबर एजाज पटेलने दोन विकेट्स घेतल्या. तसेच साऊदी आणि फिलिप्सने प्रत्येकी एक विकेट घेतली.