Virat Kohli Asia Cup IND vs PAK: आशिया चषकातील बहुप्रतीक्षित सामना भारत विरुद्ध पाकिस्तान सलग दोन वेळा रद्द होऊन अखेरीस आज कोलंबो मध्ये पार पडत आहे. पाकिस्तानने काल नाणेफेक जिंकून भारताला प्रथम फलंदाजीसाठी बोलावले होते. पावसामुळे अर्धवट राहिलेला भारत विरुद्ध पाकिस्तान सामना आज पुन्हा २४ व्या षटकापासून सुरु झाला. काल रोहित शर्मा आणि शुबमन गिलने सुद्धा दमदार सुरुवात केल्याने भारताची बाजू मजबूत दिसून येत होतीच पण आज विराट कोहली व के. एल. राहुलने अपेक्षेपेक्षा खूप पुढे नेऊन भारताची धावसंख्या ३५६ वर नेऊन ठेवली. पाकिस्तानच्या तगड्या गोलंदाजांसमोर फलंदाजीचे आव्हान पेलताना के. एल. राहुल व विराटने केलेल्या कामगिरीचं सोशल मीडियावर खूप कौतुक होत आहे. पण एका खास व्यक्तीने केलेलं कौतुक सध्या खूपच चर्चेत आहे.
मागील आयपीएलपासून विराट कोहली विरुद्ध गौतम गंभीर हा वाद खूपच पेटला होता. मध्यंतरी विराटच्या चाहत्यांना गंभीरने चुकीच्या पद्धतीने हातवारे केल्याने वाद अजूनच चिघळला होता. केवळ कोहलीच नव्हे तर के. एल राहुलच्या क्षमतेविषयी सुद्धा गंभीरने प्रश्न केले होते. पण आज दोघांच्या कमाल खेळीनंतर स्वतः गौतम गंभीरनेही कोहली व राहुलचे तोंडभर कौतुक केले आहे.
नेमकं कोहलीच्या शतकपूर्तीच्या वेळी गौतम गंभीर सुद्धा कॉमेंट्री पॅनलवर होता, तेव्हाही त्याने कोहलीच्या खेळाचे कौतुक केले. तर मध्यंतरात सुद्धा गंभीर म्हणाला की, “विराट आणि के.एलने खूप दबावात खेळूनही खूप जबरदस्त गेम दाखवला आहे. त्यांनी जे केलं ते सोपं नव्हतं.या दोघांनी फॉर्ममध्ये परतणं हे भारताच्या आगामी विश्वचषकाच्या दृष्टीने फायद्याचं आहे”
Video: विराट कोहलीचे शतक
IND vs Pak पूर्वी गौतम गंभीर काय म्हणाला?
दरम्यान, याआधी सुद्धा विराट कोहलीच्या २०१२ मधील सामन्याची आठवण काढून गौतम गंभीरने किंग कोहलीचे कौतुक केले होते. जेव्हा विराटने १८३ धावा केल्या तेव्हा रोहित शर्मा धावांच्या बाबत कोहलीच्या पुढे होता पण कोहलीने दबाव सांभाळून खूप उत्तम खेळीचे प्रदर्शन केले होते. विशेष म्हणजे याच २०१२ च्या पाकिस्तान विरुद्ध सामन्यात गंभीर सुद्धा प्लेइंग ११ मध्ये होता मात्र धावांचं खातंही न खोलता तो पॅव्हेलियनमध्ये परतला होता.
हे ही वाचा<< IND vs PAK: विराट कोहलीने शतक करताच डोनाल्ड ट्रम्प यांचं ट्वीट चर्चेत; वसीम जाफरने दाखवला स्क्रिनशॉट
दुसरीकडे, कोहलीच्या चाहत्यांनी अजूनही गौतम गंभीरवरचा राग सोडलेला नाही. सोशल मीडियावर सध्या गौतम गंभीरवर अनेक मीम्स व्हायरल होत आहेत.