IND vs PAK (Asia cup 2023) Babar Azam record vs India: २ सप्टेंबर (शनिवार) रोजी आशिया कपमध्ये भारत आणि पाकिस्तान यांच्यात हायव्होल्टेज सामना होणार आहे. दोन्ही संघ १० महिन्यांनंतर आंतरराष्ट्रीय क्रिकेटच्या कोणत्याही फॉरमॅटमध्ये आमनेसामने असतील. गेल्या वर्षी टी२० विश्वचषकात दोघांमध्ये लढत झाली होती. मात्र, यावेळी रोहित शर्मा आणि बाबर आझमचा संघ वन डे फॉरमॅटमध्ये एकमेकांविरुद्ध भिडणार आहे. या सामन्यात सर्वांच्या नजरा बाबर आझमकडे लागल्या आहेत. सध्याच्या आशिया चषक स्पर्धेतील पहिल्या सामन्यात त्याने नेपाळविरुद्ध १५१ धावांची खेळी करून इतर संघांना इशारा दिला आहे. बाबर भलेही चांगल्या फॉर्ममध्ये असेल, पण एकदिवसीय सामन्यांमध्ये भारताविरुद्ध त्याचा रेकॉर्ड खराब आहे.
भारत आणि पाकिस्तानचे संघ चार वर्षांनंतर एकदिवसीय सामन्यात आमनेसामने येणार आहेत. मँचेस्टरमधील ओल्ड ट्रॅफर्ड येथे २०१९च्या विश्वचषकात दोघांमध्ये शेवटचा सामना झाला होता. त्या सामन्यात बाबर आझमही खेळला होता. कुलदीप यादवच्या शानदार चेंडूवर तो ४८ धावांवर बाद झाला. बाबरने भारताविरुद्ध आतापर्यंत पाच वनडे सामने खेळले आहेत. यादरम्यान त्याच्या खात्यात एकही शतक किंवा अर्धशतक नाही.
बाबरची भारताविरुद्धची सरासरी ४० पेक्षा कमी आहे
बाबरने एकदिवसीय क्रिकेटमध्ये एकूण १०४ सामने खेळले आहेत. या कालावधीत ५९.४७ च्या सरासरीने ५३५३ धावा केल्या आहेत. त्याच्या नावावर १९शतके आहेत. वन डेमध्ये उत्कृष्ट रेकॉर्ड असूनही टीम इंडियाविरुद्धच्या सामन्यांमध्ये तो नेहमीच संघर्ष करत आला आहे. बाबरने भारताविरुद्धच्या पाच सामन्यांच्या पाच डावात केवळ १५८ धावा केल्या आहेत. त्याची सरासरीही ४० पेक्षा कमी आहे. पाकिस्तानी कर्णधाराने ३१.६०च्या सरासरीने आणि ७५.९६च्या स्ट्राईक रेटने धावा केल्या आहेत.
भारताविरुद्धच्या एकदिवसीय सामन्यात बाबरची कामगिरी
| वर्ष | टूर्नामेंट | स्पर्धेचे ठिकाण | धावा |
| २०१७ | चॅम्पियन्स ट्रॉफी | बर्मिंगहॅम | ८ |
| २०१७ | चॅम्पियन्स ट्रॉफी | ओव्हल | ४६ |
| २०१८ | आशिया कप | दुबई | ४७ |
| २०१८ | आशिया कप | दुबई | ९ |
| २०१९ | एकदिवसीय विश्वचषक | मँचेस्टर | ४८ |
कुलदीपसमोर बाबर आझमची खराब आकडेवारी
बाबरला भारताविरुद्ध खेळताना त्याला उमेश यादव, केदार जाधव आणि कुलदीप यादव (दोनदा) यांनी बाद केले आहेत. तसेच, एकदा धावबाद झाला आहे. अशा स्थितीत त्याचा विक्रम पाहता त्याला भारतीय फिरकीपटू आणि विशेषत: कुलदीप यादव याच्यासमोर खूप खेळायला त्रास होतो. यावेळीही कुलदीप संघात आहे आणि याआधी त्याने त्याला दोनदा बाद केले आहे. कुलदीपला पुन्हा एकदा पाकिस्तानी कर्णधाराला पॅव्हेलियनमध्ये पाठवण्याची संधी आहे.
आशिया कपसाठी दोन्ही संघ
भारत: रोहित शर्मा (कर्णधार), हार्दिक पांड्या (उपकर्णधार), शुबमन गिल, विराट कोहली, श्रेयस अय्यर, के.एल. राहुल, सूर्यकुमार यादव, तिलक वर्मा, इशान किशन, रवींद्र जडेजा, शार्दुल ठाकूर, अक्षर पटेल, कुलदीप यादव, जसप्रीत बुमराह, मोहम्मद शमी, मोहम्मद सिराज, प्रसिद्ध कृष्णा. बॅकअप: संजू सॅमसन.
पाकिस्तानः अब्दुल्ला शफीक, फखर जमान, इमाम-उल-हक, बाबर आझम (कर्णधार), सलमान अली आगा, इफ्तिखार अहमद, तैयब ताहिर, मोहम्मद रिझवान, मोहम्मद हरीस, शादाब खान (उपकर्णधार), मोहम्मद नवाज, उसामा मीर, फहीम अश्रफ , हारिस रौफ, मोहम्मद वसीम ज्युनियर, नसीम शाह, शाहीन आफ्रिदी.
