Sunil Gavaskar on Asia Cup 2023: आशिया चषकाच्या सुपर-४ टप्प्यातील सामन्यात भारताने पाकिस्तानचा २२८ धावांनी एकतर्फी पराभव केला. या सामन्यात भारताच्या पहिल्या चार फलंदाजांनी पाकिस्तानी गोलंदाजांवर जोरदार हल्ला चढवला. या सामन्यात विराट कोहली आणि के.एल. राहुलनेही शतके झळकावली. त्याआधी रोहित शर्मा आणि शुबमन गिल यांनी अप्रतिम अर्धशतके झळकावली, जे पाहून प्रत्येक भारतीय क्रिकेट चाहत्यांना आनंद झाला. दरम्यान, माजी भारतीय क्रिकेटपटू सुनील गावसकर यांनी आपली प्रतिक्रिया दिली आहे. गावसकर म्हणतात की, “भारताने पाकिस्तानची पूर्णपणे धुलाई केली.”
इंडिया टुडेशी बोलताना गावसकर म्हणाले, “सर्वात मोठ्या विजयाबद्दल बोला, मागील सामना पावसामुळे रद्द झाला होता. आता पावसात जसे धोबी घाटावर धोबी कपडे धुतात तसे भारतीय फलंदाजांनी पाकिस्तानच्या गोलंदाजांची धुलाई केली आहे. जर तुम्ही परिपूर्ण संघ असाल तर शेवटच्या सामन्याच्या निकालाचा तुमच्यावर परिणाम होऊ देत नाही. जर त्याचा जास्त विचार केला तर तुम्ही पुढच्या सामन्यावर लक्ष केंद्रित करू शकणार नाहीत. पाकिस्तानकडून अशी चूक होण्याची मला अपेक्षा नाही.”
विराट कोहलीने पाकिस्तानविरुद्ध पुन्हा एकदा फलंदाजी केली आणि त्याने कारकिर्दीतील ७७वे शतक पूर्ण केले. त्याचवेळी दुखापतीनंतर टीम इंडियात पुनरागमन करणाऱ्या के.एल. राहुलने पहिल्या सामन्यातच शतक झळकावले. गावसकर यांनी के.एल. राहुलचे खूप कौतुक केले आहे. ते म्हणाले, “के.एल. राहुलने केवळ शतकच केले नाही तर विकेट्सही राखल्या. त्याच्या फिटनेसबाबत सुरू असलेल्या चर्चांना त्याने ही दिलेली ही प्रतिक्रिया आहे. त्याने सिद्ध केले की तो पूर्णपणे तंदुरुस्त आहे.”
लिटल मास्टर गावसकर यांनीही भारतीय गोलंदाजीचे कौतुक केले. ते म्हणाले, “जसप्रीत बुमराहही जबरदस्त फॉर्ममध्ये दिसत होता. त्याची रन अप चांगली दिसत होती आणि त्याने चेंडू दोन्ही बाजूंनी स्विंग केला. बाबर आझमसारखे जागतिक दर्जाचे फलंदाजही त्याला खेळू शकले नाहीत. यातून तो नुसता फिट नाही तर फॉर्ममध्ये देखील आहे.”
उल्लेखनीय गोष्ट अशी आहे की, आशिया चषकाच्या सुपर-४ टप्प्यातील या सामन्यात भारतीय संघाने पाकिस्तानचा २२८ धावांच्या मोठ्या फरकाने पराभव केला आहे. ज्यामध्ये विराट कोहलीने १२२ आणि के.एल. राहुलने १११ धावा केल्या. फिरकी गोलंदाज कुलदीप यादवनेही पाच विकेट्स घेतल्या. मंगळवारी (१२ सप्टेंबर) सुपर-४ मध्ये श्रीलंकेविरुद्ध दुसरा सामना खेळत असून श्रीलंकेसमोर २१४ धावांचे आव्हान ठेवले आहे. सुपर-४ मध्ये भारताचे खाते उघडले आहे. त्याच्या खात्यात दोन गुण जमा झाले आहेत. पाकिस्तान आणि श्रीलंकेचेही प्रत्येकी दोन गुण आहेत.
