“बिनडोक व मूर्ख…”, पाकिस्तानच्या पराभवानंतर शोएब अख्तर कोणावर संतापला? म्हणाला, “बिचारी मुलं…”

दरम्यान, पाकिस्तानी संघाच्या पराभवानंतर त्यांच्या देशातील क्रिकेटरसिक नाराज आहेत. मात्र, माजी पाकिस्तानी क्रिकेटपटू शोएब अख्तर म्हणाला, “या सामन्याचा निकाल पाहून मला काही आश्चर्य वाटलं नाही. कारण, आपला संघ दुबळा होता. यामध्ये आपल्या संघ व्यवस्थापनाच्या चुका आहेत”.

हा निकाल पाहून मी निराश झालो नाही : अख्तर

शोएब अख्तर म्हणाला, “भारत पाकिस्तान सामन्याचा जो काही निकाल लागला आहे तो पाहून मी निराश झालेलो नाही. कारण मला अशा निकालाची कल्पना होतीच. पाकिस्तानी संघ व्यवस्थापनाला पाच गोलंदाज देखील निवडता आले नाहीत. जगभरातील अनेक संघ सहा गोलंदाजांना घेऊन मैदानात उतरत आहे आणि पाकिस्तानचा संगम मात्र दोन अष्टपैलू खेळाडूंसह मैदानात उतरला होता संघ व्यवस्थापनाच्या बिनडोक व मूर्खपणामुळे आपल्याला हा पराभव पहावा लागला आहे. त्यामुळे त्या बिचाऱ्या मुलांना (पाकिस्तानी संघातील खेळाडू) आपण काय बोलणार?संघ व्यवस्थापन जसं आहे त्याचप्रमाणे आपली मुलं क्रिकेट खेळत आहेत. त्यामुळे मी हा निकाल पाहून बिलकुल निराश झालो नाही.”

माजी पाकिस्तानी क्रिकेटपटू म्हणाला, “संघ व्यवस्थापनाच्या चुकांमुळे संघातील खेळाडूंना नेमकं करायचं काय आहे तेच माहिती नव्हतं. त्यांच्याकडे तो आक्रमकपणा नव्हता. आपल्या खेळाडूंमध्ये चांगलं कौशल्य दिसलं नाही. रोहित शर्मा, विराट कोहली, शुभमन गिल ज्याप्रमाणे खेळत होते तसं पाकिस्तानच्या फलंदाजांना खेळता आलं नाही. आपल्या फलंदाजांनी नको त्यावेळी हवेत फटके मारले. भारतीय फलंदाजांनी ती चूक केली नाही. संघ व्यवस्थापनाने कोणताही विचार न करता, नियोजन न करता आपल्या मुलांना मैदानात पाठवलं. त्या बिचाऱ्या मुलांना मैदानात जाऊन काय करायचं तेच माहिती नव्हतं. मी पुन्हा एकदा सांगतो मी संघ व्यवस्थापनामुळे निराश झालो आहे.