टी ट्वेंटी मालिकेसाठी दक्षिण आफ्रिकेचा संघ भारतात दाखल, भारताचा विजयीरथ थांबवण्याचे असेल आव्हान

भारत आणि दक्षिण आफ्रिका टी ट्वेंटी मालिकेतील पहिला सामना दिल्लीतील अरुण जेटली स्टेडियमवर खेळवला जाणार आहे. या सामन्यात भारतीय संघ एक खास विक्रम आपल्या नावावर करू शकतो. भारतीय संघाने मागील सलग १२ टी ट्वेंटी सामन्यांमध्ये विजय मिळवला आहे. हे सलग विजय मिळवत भारतीय संघाने अफगाणिस्तान आणि रोमानियाशी बरोबरी साधली होती. आता ९ जूनला होणारा १३वा सामना जिंकून नवीन विक्रम करण्यास भारतीय संघ उत्सुक आहे.

भारत दौऱ्यावर आलेल्या दक्षिण आफ्रिकेच्या संघातील अनेक खेळाडू सध्या उत्कृष्ट फॉर्ममध्ये आहेत. डेव्हिड मिलरला तर आयपीएल खेळण्याचा चांगला अनुभव आहे. नुकत्याच पार पडलेल्या आयपीएल हंगामात मिलरने ४८१ धावा केल्या होत्या. अशा परिस्थितीत आफ्रिकन संघाला भारताला रोखायचा असेल, तर मिलर त्यांच्यासाठी सर्वात महत्त्वाचा खेळाडू ठरू शकतो.

भारतीय चमूचा विचार केला तर, या मालिकेसाठी अनेक युवा खेळाडूंना संधी देण्यात आली असून अनुभवी खेळाडूंना विश्रांती दिली गेली आहे. विराट कोहली आणि रोहित शर्माच्या अनुपस्थितीमध्ये केएल राहुल भारतीय संघाचे कर्णधारपद भूषवणार आहे.