IND vs SA 3rd ODI : विराटचा शिलेदार पदार्पणाच्या सामन्यात ठरला अपयशी, अवघ्या २२ धावा करुन परतला तंबूत

रजत पाटीदारचा हा पहिलाच आंतरराष्ट्रीय सामना आहे. देशांतर्गत क्रिकेटमध्ये मध्य प्रदेशकडून खेळणाऱ्या रजतने आतापर्यंत ५२ प्रथम श्रेणी, ५७ लिस्ट ए आणि ५० टी-२० सामने खेळले आहेत. रजत पाटीदार हा आयपीएलमधील विराट कोहलीच्या रॉयल चॅलेंजर्स बंगळुरु संघाचा सदस्य आहे. ऋतुराज गायकवाडची दुखापत हे देखील रजत पाटीदारच्या पदार्पणाचे एक कारण असल्याचे बोलले जात आहे. भारत आणि दक्षिण आफ्रिका यांच्यातील तिसर्‍या वनडे सामन्यापूर्वी रुतुराज गायकवाड जखमी झाल्याचे सांगण्यात आले. त्याच्या जागी रजत पाटीदारला प्लेइंग इलेव्हनमध्ये स्थान देण्यात आले आहे.

विराट शिलेदार पदार्पणाच्या सामन्यात ठरला अपयशी –

दक्षिण आफ्रिकेचा कर्णधार एडन मार्करामने नाणेफेक जिंकून गोलंदाजी करण्याचा निर्णय घेतला. प्रथम फलंदाजी करायला उतरलेल्या भारताची पहिली विकेट ३४ धावांवर पडली. रजत पाटीदार १६ चेंडूत २२ धावा करून पॅव्हेलियनमध्ये परतला. त्यानंतर साई सुदर्शन १२ चेंडूत १० धावा करून बाद झाला. हेंड्रिक्सने त्याला विकेट्ससमोर पायचीत केले. या सामन्यात केएल राहुलची बॅट चालली नाही. ३५ चेंडूत २१ धावा करून तो बाद झाला. राहुलने आपल्या खेळीत दोन चौकार मारले. व्हियान मुल्डरच्या चेंडूवर तो हेनरिक क्लासेनकरवी झेलबाद झाला.

हेही वाचा – ब्रिजभूषण शरण सिंह यांचे निकटवर्तीय कुस्ती महासंघाचे नवे अध्यक्ष, साक्षी मलिकने घेतला निवृत्तीचा निर्णय; म्हणाली, ‘आम्ही ४० दिवस…’

सॅमसन आणि तिलक यांनी सावरला भारताचा डाव –

संजू सॅमसन आणि तिलक वर्मा यांनी चौथ्या विकेटसाठी अर्धशतकी भागीदारी पूर्ण केली आहे. भारताने ३४ षटकात ३ विकेट गमावत १५६ धावा केल्या आहेत. संजू सॅमसन ६१ आणि तिलक वर्मा २९ धावांवर नाबाद आहे. दोघांनी चौथ्या विकेटसाठी ५५ धावांची भागीदारी केली.
भारतीय प्लेइंग इलेव्हन: केएल राहुल (कर्णधार), रजत पाटीदार, साई सुदर्शन, संजू सॅमसन, तिलक वर्मा, रिंकू सिंग, वॉशिंग्टन सुंदर, अक्षर पटेल, अर्शदीप सिंग, आवेश खान, मुकेश कुमार.