IND vs SA : संजू सॅमसनने सलग दोन शतकांनंतर केला नकोसा विक्रम, ‘या’ बाबतीत युसूफ-रोहितला टाकले मागे

सॅमसन एका वर्षात सर्वाधिक वेळा टी-२० मध्ये शून्यावर बाद होणारा भारतीय फलंदाज ठरला –

संजू सॅमसनने आता शून्यावर आऊट होऊन १५ वर्षे जुना नकोसा विक्रम आपल्या नावावर केला आहे. खरं तर, सॅमसन आता एका वर्षात टी-२० आंतरराष्ट्रीय सामन्यांमध्ये सर्वाधिक शून्यावर आऊट होणारा भारतीय खेळाडू ठरला आहे. याआधी हा विक्रम युसूफ पठाणच्या नावावर होता, जो २००९ साली टी-२० आंतरराष्ट्रीय सामन्यात खाते न उघडता तीन वेळा पॅव्हेलियनमध्ये परतला होता. सॅमसनला या सामन्यात खातेही उघडण्यात यश आले नाही, तर शेवटच्या दोन डावात त्याने शतके झळकावली होती, त्यामुळे संघासाठी ही फारशी चिंतेची बाब नाही. संजू हा भारतीय क्रिकेटमधला पहिला खेळाडू ठरला आहे, ज्याने सलग दोन टी-२० आंतरराष्ट्रीय डावात शतके झळकावली आहेत.

भारताकडून आंतरराष्ट्रीय टी-२० मध्ये वर्षभरात सर्वाधिक वेळा शून्यावर आऊट झालेले खेळाडू :

संजू सॅमसन – ४ वेळा (२०२४)
युसूफ पठाण – ३ वेळा (२००९)
रोहित शर्मा – ३ वेळा (२०१८)
रोहित शर्मा – ३ वेळा (२०२२)
विराट कोहली – ३ वेळा (२०२४)

हेही वाचा – IND vs SA सामन्यात रायन रिकेल्टनने हार्दिक पंड्याला षटकार मारताच प्रेक्षकाने केलं असं काही की… VIDEO होतोय व्हायरल

भारताने दुसऱ्या टी-२० सामन्यात दक्षिण आफ्रिकेसमोर १२५ धावांचे लक्ष्य ठेवले. दक्षिण आफ्रिकेचा कर्णधार एडन मार्करमने नाणेफेक जिंकून प्रथम गोलंदाजी करण्याचा निर्णय घेतला आणि त्याच्या गोलंदाजांनी भारताला सुरुवातीपासूनच धक्के दिले आणि भारतीय फलंदाजांना मोठी धावसंख्या करण्यापासून रोखले. भारताकडून अष्टपैलू हार्दिक पांड्याने ४५ चेंडूंत ४ चौकार आणि १ षटकाराच्या मदतीने सर्वाधिक नाबाद ३९ धावा केल्या. हार्दिक व्यतिरिक्त अक्षर पटेलने २१ चेंडूत २७ आणि तिलक वर्माने २० चेंडूत २० धावा केल्या.