Ind vs WI : पहिल्या डावात इशांत शर्माची अनोखी कामगिरी, १३ वर्ष अबाधित विक्रमाशी केली बरोबरी

पहिल्या डावात इशांत शर्माने विंडीजच्या क्रेग ब्रेथवेट आणि शेमरॉन हेटमायर यांना आपल्याच गोलंदाजीवर झेल घेत माघारी धाडलं. कसोटी क्रिकेटमध्ये एका डावात अशी कामगिरी करणारा इशांत दुसरा भारतीय गोलंदाज ठरला आहे. याआधी २००६ साली मोहाली कसोटीमध्ये पदार्पण करणाऱ्या मुनाफ पटेलने इंग्लंडच्या केविन पिटरसन आणि अँड्रू फ्लिंटॉफला आपल्याच गोलंदाजीवर झेल घेत माघारी धाडलं होतं. यानंतर तब्बल १३ वर्षांनी इशांतने या अनोख्या कामगिरीशी बरोबरी साधली आहे.

दरम्यान, पहिल्या डावाच्या तुलनेत भारतीय फलंदाजांनी दुसऱ्या डावात आश्वासक खेळ केला. तरीही सलामीवीर मयांक अग्रवालला झटपट माघारी धाडण्यात विंडीज यशस्वी ठरलं. फिरकीपटू रोस्टन चेसने त्याला पायचीत करत माघारी धाडलं. यानंतर लोकेश राहुल आणि चेतेश्वर पुजारा यांनी भारताचा डाव सावरण्याचा प्रयत्न केला, मात्र ठराविक अंतराने ते ही माघारी परतले. यानंतर कर्णधार विराट कोहली आणि उप-कर्णधार अजिंक्य रहाणेने भारताचा डाव सावरला. दोन्ही फलंदाजांनी मोठे फटके खेळण्याचा मोह टाळत खेळपट्टीवर स्थिरावण्याकडे भर दिला. ज्याचा फायदा भारतीय संघाला झालेला पहायला मिळाला. दिवसाचा खेळ संपला तेव्हा विराट कोहली नाबाद ५१ तर अजिंक्य रहाणे नाबाद ५३ धावांवर खेळत होता. वेस्ट इंडिजकडून दुसऱ्या डावात आतापर्यंत रोस्टन चेसने २ तर केमार रोचने १ बळी घेतला.