India vs West Indies: वेस्ट इंडिज आणि भारत यांच्यात खेळल्या जात असलेल्या पहिल्या कसोटीच्या पहिल्या डावात भारताने आघाडी घेतली आहे. प्रथम फलंदाजी करताना वेस्ट इंडिजचा संघ पहिल्या डावात १५० धावांवर सर्वबाद झाला, त्याला प्रत्युत्तरात भारताने दोन गडी गमावून ३१२ धावा केल्या. टीम इंडियाच्या डावाची सुरुवात करताना कर्णधार रोहित शर्मा आणि युवा फलंदाज यशस्वी जैस्वाल यांनी शतके झळकावली. दोन्ही सलामीवीरांनी पहिल्या विकेटसाठी २२९ धावांची भागीदारी केली. शतकी खेळीसह दोन्ही सलामीवीरांनी २२ वर्षे जुना विक्रम मोडला.
रोहित-यशस्वी जोडीने २२ वर्षे जुना विक्रम मोडला
रोहित-यशस्वी यांनी नंतर संजय बांगर आणि वीरेंद्र सेहवागची सर्वात मोठी सलामीची भागीदारीचा विक्रम मोडला. २००२ मध्ये मुंबईच्या वानखेडे स्टेडियमवर सेहवाग आणि बांगर यांनी डावाची सुरुवात केली आणि २०१ धावांची भागीदारी केली. आणि १३ जुलै रोजी रोहित आणि यशस्वीने मिळून हा विक्रम मोडला.
१७ वर्षे जुना रेकॉर्डही मोडला
रोहितने १० चौकार आणि २ षटकारांसह १०३ धावा केल्या तर यशस्वीने १४ चौकारांच्या मदतीने नाबाद १४३ धावा केल्या. या शतकी खेळीने दोन्ही सलामीवीरांनी अनेक विक्रम मोडीत काढले. वेस्ट इंडिजच्या भूमीवर शतकी भागीदारी करणारी रोहित-यशस्वी ही २००६ नंतर पहिली सलामीची जोडी ठरली. कॅरेबियनमध्ये केवळ चार भारतीय सलामी जोडींनी शतकी भागीदारी केली आहे.
या सलामीच्या जोडींमध्ये शतकी भागीदारी झाली आहे
१९७१ मध्ये सुनील गावसकर आणि अशोक मांकड यांनी १२३ धावांची नाबाद भागीदारी केली होती. गावसकर यांनी कॅरेबियन मैदानावर अंशुमन गायकवाड यांच्यासोबत शतकी भागीदारीही रचली होती. यानंतर वीरेंद्र सेहवाग आणि वसीम जाफर या सलामीच्या जोडीने २००६ साली मिळून १५९ धावा केल्या होत्या. आता या दोन्ही जोडींचा रोहित आणि यशस्वीने मिळून १७ वर्षांचा विक्रम मोडला आहे. यशस्वी जैस्वालने ६१व्या षटकात जेसन होल्डरच्या चेंडूवर चौकार मारून सेहवाग आणि जाफरची भागीदारी मागे टाकत नवा विक्रम केला आहे. दुसऱ्या दिवसाचा खेळ संपेपर्यंत भारताने यजमानांवर १६२ धावांची आघाडी घेतली आहे. मैदानावर यशस्वी जैस्वाल नाबाद १४६ आणि विराट कोहली ३६ धावांवर खेळत आहे.
वेस्ट इंडिजविरुद्ध भारतीय सलामीची सर्वात मोठी भागीदारी
२०९* – रोहित शर्मा आणि यशस्वी जैस्वाल, रॉसियो, २०२३
२०१ – वीरेंद्र सेहवाग आणि संजय बांगर, मुंबई वानखेडे, २००२
१५९ – वीरेंद्र सेहवाग आणि वसीम जाफर, ग्रॉस आइलेट, २००६
१५३ – सुनील गावसकर आणि चेतन चौहान, मुंबई वानखेडे, १९७८
१३६- सुनील गावसकर आणि अंशुमन गायकवाड, किंग्स्टन, १९७६
