IND vs ZIM Best Fielder Medal Video: टी-२० चॅम्पियन ठरल्यानंतर भारताच्या युवा ब्रिगेडनेही विश्वचषकानंतरची पहिला टी-२० मालिका जिंकत विजयाने सुरूवात केली आहे. शुभमन गिलच्या नेतृत्वाखाली भारतीय संघाने झिम्बाब्वेचा ४-१ असा पराभव करत मालिका आपल्या नावे केली. टी-२० विश्वचषकानंतर कोचिंग स्टाफ बदलला असला तरी परंपरा मात्र तशाच सुरू राहणार आहेत. त्यापैकी एक म्हणजे झिम्बाब्वेविरूद्ध मालिकेतील बेस्ट फिल्डरचं मेडल देतानाचा व्हीडिओ शेअर करण्यात आला आहे. पाहा कोणाला मिळालं बेस्ट फिल्डर मेडल?
हेही वाचा – Champions Trophy 2025: ‘भारतीय संघ पाकिस्तानात नाही आला तर…’, PCB ने BCCIला दिली धमकी?
भारतीय क्रिकेट संघाच्या ड्रेसिंग रूममधील बेस्ट फिल्डर मेडलचा व्हिडिओ बीसीसीआयने शेअर केला आहे. यामध्ये क्षेत्ररक्षण प्रशिक्षक सुभदीप घोष यांनी मालिकेतील पदक विजेत्याची घोषणा केली. बेस्ट फिल्डर मेडलची घोषणा ही टी दिलीप यांच्याकडून नेहमी व्हायची त्यामुळे चाहत्यांनाही त्यांच्या आवाजाची सवय होती. त्यासाठी सुभदीप घोष यांनी माजी क्षेत्ररक्षण प्रशिक्षक टी दिलीप यांचा एक व्हिडिओ संदेश खेळाडूंना दाखवला.
यामध्ये टी दिलीप म्हणतात, “भारतीय क्रिकेटमध्ये खेळाडूंच्या क्षेत्ररक्षणाला नेहमीच महत्त्व दिले गेले आहे. हा खेळाचा एक पैलू आहे जिथे आपण अनेक वर्षांमध्ये चांगली कामगिरी केली आहे. आपण या विभागात उत्कृष्ट कामगिरी करत राहण्यासाठी प्रयत्नशील राहण्याचे ध्येय ठेवले पाहिजे. पदकांची क्षेत्ररक्षणाची परंपरा आपल्याला माहिती आहे. हे पदक आपल्या क्षेत्ररक्षणाने सामन्यावर चांगला परिणाम करणाऱ्या खेळाडूला दिले जाते.”
यानंतर घोष यांनी झिम्बाब्वेविरुद्धच्या मालिकेदरम्यान भारतीय खेळाडूंनी केलेल्या उत्कृष्ट क्षेत्ररक्षणाबद्दल त्यांचे कौतुक केले. यानंतर त्याने रिंकू सिंगला मालिकेतील बेस्ट फिल्डरचे मेडल मिळाले. रिंकूला या दौऱ्यासाठी प्रशिक्षक व्हीव्हीएस लक्ष्मण यांच्याकडून पदक मिळाले. यावेळी रिंकू सिंग म्हणाला, “मला सगळ्यांसोबत खेळायला मजा आली. ही माझी चौथी किंवा पाचवी मालिका होती. त्यामुळे मला खूप मजा आली. खरे सांगायचे तर मला फलंदाजी आणि क्षेत्ररक्षण खूप आवडते. मला खूप मजा येते. मग मी आणखी काय सांगू, बाकी सर्व गॉड्स प्लॅन.”
रिंकूने बेस्ट फिल्डरचे मेडल जिंकताच खेळाडूंनी त्याला खुर्चीवर उभं राहून मेडल जिंकल्याबद्दल चार शब्द बोलायला सांगितले. सुरूवातीला रिंकू लाजत होता पण त्याला जबरदस्ती करत उभं राहावंचं लागलं. टीम इंडियाच्या ड्रेसिंग रूममधील हा व्हीडिओ आता व्हायरल होत आहे.
