IND vs PAK Emerging Asia Cup 2024 Live Streaming: क्रिकेटमधील कट्टर प्रतिस्पर्धी असलेले संघ भारत आणि पाकिस्तान यांच्यातील अटीतटीचा सामना पुन्हा एकदा पाहायला मिळणार आहे. हा चुरशीचा सामना इमर्जिंग आशिया कपमध्ये होणार आहे. भारत अ संघ पाकिस्तान अ विरूद्धच्या सामन्याने या स्पर्धेच्या मोहिमेला सुरूवात करणार आहे. भारत,पाकिस्तानव्यतिरिक्त आठ संघ या स्पर्धेत सहभागी होणार आहे. भारत-पाकिस्तान अ संघाचा हा सामना ओमान क्रिकेट अकादमी मैदानावर होणार आहे, जे मस्कत ओमान येथे आहे.
इमर्जिंग आशिया कप स्पर्धेची सुरूवात १८ ऑक्टोबरला हाँगकाँग विरूद्ध बांगलादेश या सामन्याने झाली. सलामीच्या सामन्यात बांगलादेश अ संघाने ५ गडी राखून विजय मिळवला. भारतीय वेळेनुसार दुपारी अडीच वाजता हा सामना सुरू झाला होता. पहिल्या दिवशी श्रीलंका अ आणि अफगाणिस्तान अ यांच्यातही सामना खेळवला गेला, यात अफगाणिस्तानच्या अ संघाने शानदार विजय मिळवला. आठ संघांना दोन गटांमध्ये विभागले गेले आहे. अ गटात बांगलादेश अ, अफगाणिस्तान अ, श्रीलंका अ आणि हाँगकाँग हे देश आहेत. तर ब गटात भारत अ, पाकिस्तान अ, ओमान आणि युएई हे देश आहेत.
हेही वाचा – IND vs NZ: भारतीय संघाने घडवला इतिहास, १४७ वर्षांच्या कसोटी इतिहासात ‘ही’ कामगिरी करणारा ठरला पहिला संघ
भारत अ आणि पाकिस्तान अ हे दोन्ही संघ एकाच गटात आहेत. दोन्ही गटातील अव्वल २ संघ उपांत्य फेरीत पोहोचतील. पहिल्या उपांत्य फेरीत, अ गटातील पहिल्या स्थानावरील संघाचा सामना ब गटातील दुसऱ्या स्थानावरील संघाशी होईल. दुसऱ्या उपांत्य फेरीत, ब गटातील पहिल्या स्थानावर असलेल्या संघाचा सामना अ गटातील दुसऱ्या स्थानावरील संघाशी होईल. दोन्ही उपांत्य फेरीचे सामने २५ ऑक्टोबरला होतील.
तिलक वर्माच्या नेतृत्वाखालील भारत अ आपला दुसरा सामना २१ ऑक्टोबर रोजी यूएई विरुद्ध आणि शेवटचा सामना २३ ऑक्टोबर रोजी ओमान विरुद्ध खेळेल. दरम्यान, मोहम्मद हरिसच्या नेतृत्वाखाली १५ सदस्यीय पाकिस्तान अ संघ २१ ऑक्टोबर रोजी यजमान ओमानशी भिडणार आहे. त्यानंतर, २३ ऑक्टोबर रोजी युएईविरुद्ध तिसरा गट सामना खेळेल.
भारत अ संघाचे इमर्जिंग आशिया कपमधील वेळापत्रक
भारत अ वि पाकिस्तान अ – १९ ऑक्टोबर – संध्याकाळी ७ वाजता
भारत अ वि युएई – २१ ऑक्टोबर – संध्याकाळी ७ वाजता
भारत अ वि ओमान – १९ ऑक्टोबर – संध्याकाळी ७ वाजता
इमर्जिंग आशिया कपमधील भारत अ व पाकिस्तान अ यांच्यातील सामना १९ ऑक्टोबर म्हणजे आज संध्याकाळी ७ वाजता होणार आहे. तर मोठी गोष्ट म्हणजे इमर्जिंग आशिया कपचे लाईव्ह प्रक्षेपण कोणत्याही स्पोर्ट्स चॅनेलद्वारे टीव्हीवर टेलिकास्ट होणार नाही. पण या सामन्याचे लाईव्ह स्ट्रिमिंग फॅनकोड या अ‍ॅपवर पाहता येईल.
© IE Online Media Services (P) Ltd