India defeated UAE by 78 runs in T20 Women’s Asia Cup 2024 : महिला आशिया चषक २०२४ मध्ये भारताने सलग दुसरा सामना जिंकला. टीम इंडियाने यूएईचा ७८ धावांनी पराभव केला. पहिल्या सामन्यात भारताने पाकिस्तानचा पराभव केला होता. आता दुसरा सामनाही जिंकला. प्रथम फलंदाजी करताना टीम इंडियाने २०२ धावांचे लक्ष्य दिले होते. यादरम्यान ऋचा घोष आणि हरमनप्रीत कौर यांनी स्फोटक खेळी खेळली. भारताने दिलेल्या लक्ष्याचा पाठलाग करण्यासाठी आलेल्या यूएईचा संघ ७ गडी गमावून केवळ १२३ धावा करू शकला. अशा प्रकारे भारतीय महिला संघाने टी-२० आंतरराष्ट्रीय क्रिकेटमध्ये पहिल्यांदाच दोनशे धावांचा टप्पा इतिहास रचला. त्याचबरोबर २०१ धावा ही महिला टी-२० आशिया कपच्या इतिहासातील कोणत्याही संघाची सर्वोच्च धावसंख्या आहे.
ऋचा घोषची वादळी खेळी –
या सामन्यात प्रथम फलंदाजी करताना टीम इंडियाने ५ गडी गमावून २०१ धावा केल्या. यादरम्यान ऋचाने गोलंदाजांची दमछाक केली. तिने २९ चेंडूत नाबाद ६४ धावा केल्या. रिचाच्या या खेळीत १२ चौकार आणि १ षटकारांचा समावेश होता. हरमनप्रीतने ४७ चेंडूत ६६ धावा केल्या. तिने ७ चौकार आणि एक षटकार मारला. याआधी सलामीवीर शफाली वर्माने ३७ धावांची महत्त्वपूर्ण खेळी केली. १८ चेंडूंचा सामना करताना तिन ५ चौकार आणि १ षटकार मारला.
दीप्ती शर्माची शानदा गोलंदाजी –
टीम इंडियासाठी दीप्ती शर्माने गोलंदाजीत शानदार कामगिरी केली. तिने ४ षटकात २३ धावा देत २ विकेट्स घेतल्या. रेणुका सिंगने ४ षटकात २० धावा देत १ विकेट घेतली. तनुजा कंवरने ४ षटकात १४ धावा देत १ विकेट घेतली. पूजाने ४ षटकात २७ धावा देत १ १ विकेट घेतली. राधा यादवनेही एक विकेट घेतली. टी-२० आंतरराष्ट्रीय सामन्यात भारतीय महिला संघाने २०० हून अधिक धावा करण्याची ही पहिलीच वेळ आहे. असे यापूर्वी कधीच घडले नव्हते. २०१ धावा ही भारतीय महिला संघाची टी-२० आंतरराष्ट्रीय क्रिकेटमधील सर्वोच्च धावसंख्या आहे.
हेही वाचा – MS Dhoni : तुषार देशपांडेने धोनीला गुरुपौर्णिमेच्या दिल्या खास शुभेच्छा, इन्स्टावर वडिलांसह शेअर केला फोटो
टी-२० आंतरराष्ट्रीय सामन्यांमध्ये भारतीय महिला संघाची सर्वोच्च धावसंख्या:
यूएई विरुद्ध २०१ धावा
इंग्लंड विरुद्ध – १९८ धावा
न्यूझीलंड विरुद्ध – १९४ धावा
ऑस्ट्रेलिया विरुद्ध – १८७ धावा
भारतीय महिला संघाचा आशिया कपमध्ये उभारली सर्वोच्च धावसंख्या –
२०१ धावा ही महिला टी-२० आशिया कपच्या इतिहासातील कोणत्याही संघाची सर्वोत्तम धावसंख्या आहे. भारतीय महिला संघाने आपलाच दोन वर्षे जुना विक्रम मोडला आहे. यापूर्वी भारतीय महिला संघाने २०२२ मध्ये मलेशियाच्या महिला संघाविरुद्ध १८१ धावा केल्या होत्या.
हेही वाचा – MS Dhoni : “जब लगे लात पड़ने वाली है…”, धोनीच्या निवृत्तीच्या प्लॅनबद्दल मोहम्मद शमीचा मोठा खुलासा
महिला टी-२० आशिया कपमध्ये सर्वोच्च धावसंख्या नोंदवणारे संघ:
भारतीय महिला संघ- २०१ धावा
भारतीय महिला संघ- १८१ धावा
भारतीय महिला संघ- १७८ धावा
पाकिस्तानी महिला संघ- १७७ धावा
भारतीय महिला संघ- १६९ धावा
© IE Online Media Services (P) Ltd