भारतीय संघाला बदलाची गरज, प्रशिक्षकपदासाठी अर्ज केलेल्या रॉबिन सिंहचा शास्त्रींवर निशाणा

“भारतीय संघाच्या सध्याच्या प्रशिक्षकांच्या मार्गदर्शनाखाली भारतीय संघ सलग दोनवेळा विश्वचषकात उपांत्य फेरीमधून बाहेर पडला. टी-२० क्रिकेटमध्येही भारताची कामगिरी फारशी चांगली होत नाहीये. कधीकधी प्रशिक्षकाने स्वतःला खेळाडूंच्या जागी ठेऊन विचार करणं गरजेचं असतं. खेळाडूंच्या मनात नेमकं काय आहे हे जाणून नव्याने रणनिती आखण गरजेचं आहे. जर तुम्हाला खेळ कळत असेल तर ही गोष्ट सहज करु शकता. त्यामुळे २०२३ विश्वचषकापूर्वी भारतीय संघाला बदलाची गरज आहे.” रॉबिन सिंह ‘द हिंदू’ या वृत्तपत्राला दिलेल्या मुलाखतीत बोलत होता.

२००७-०९ काळात रॉबिन सिंह भारतीय संघाचे क्षेत्ररक्षण प्रशिक्षक होते. याचसोबत भारतीय संघाच्या १९ वर्षाखाली संघाला रॉबिन सिंह यांनी यशस्वीपद्धतीने मार्गदर्शन केलं आहे. इंडियन प्रिमीअर लिग स्पर्धेत मुंबई इंडियन्स सारख्या यशस्वी संघाला प्रशिक्षण देण्याचा अनुभवही रॉबिन सिंह यांच्या पदरात आहे. रॉबिन सिंह यांच्यासह माजी ऑस्ट्रेलियन खेळाडू टॉम मुडी, श्रीलंकेचा माजी कर्णधार महेला जयवर्धने, न्यूझीलंडचे माजी प्रशिक्षक माईक हेसन हे देखील प्रशिक्षकपदाच्या शर्यतीत असल्याचं कळतंय, मात्र याबद्दल अजुन अधिकृत माहिती समोर आलेली नाहीये.