Olympic Qualifiers Hockey : भारतीय संघाचं मिशन ऑलिम्पिक फत्ते

अ‍ॅलेक्स सोब्लोस्कीने पहिल्याच मिनीटाला गोल करत रशियाला आघाडी मिळवून दिली. सुरुवातीच्याच सत्रात पिछाडीवर पडलेल्या भारतीय संघासाठी हा धक्का होता. यानंतर पहिलं सत्र रशियाने आपली आघाडी कायम ठेवण्यात यश मिळवलं. मात्र दुसऱ्या सत्राच्या सुरुवातीलाच ललित उपाध्यायने गोल करत भारताला बरोबरी मिळवून दिली. यानंतर भारतीय संघाने सामन्यात मागे वळून पाहिलंच नाही. रशियन बचावफळीला खिंडार पाडत भारताच्या आघाडीच्या फळीतल्या खेळाडूंनी रशियन गोलपोस्टवर हल्ले चढवले.

भारताकडून आकाशदीप सिंह, निलकांत शर्मा, रुपिंदर सिंह आणि अमित रोहिदास यांनी गोल झळकावत भारताच्या विजयात मोलाचा वाटा उचलला. ऑलिम्पिक स्पर्धेत पात्र होण्याची भारतीय हॉकी संघाची ही २० वी वेळ ठरली आहे. आतापर्यंत भारतीय संघाच्या खात्यात ८ सुवर्णपदकं जमा आहेत. त्यामुळे आगामी ऑलिम्पिक स्पर्धेत ग्रॅहम रिड यांच्या मार्गदर्शनाखाली भारतीय संघ कशी कामगिरी करतो हे पाहणं महत्वाचं ठरणार आहे.