PM Modi calls Indian men’s hockey Team: पॅरिस ऑलिम्पिकमध्ये भारताच्या हॉकी संघाने कांस्यपदकासाठीच्या सामन्यात स्पेनवर विजय मिळवला. अशारितीने भारतीय हॉकी संघाने भारताला पॅरिस ऑलिम्पिकमधील चौथे पदक मिळवून दिले. कांस्यपदक जिंकणाऱ्या भारतीय हॉकी संघाशी देशाचे पंतप्रधान नरेंद्र मोदी यांनी फोनवर संवाद साधला. कांस्यपदकाच्या लढतीत भारताने स्पेनचा २-१ असा पराभव करून कांस्यपदक जिंकले. हरमनप्रीत सिंगच्या नेतृत्वाखालील संघ उपांत्य फेरीत जर्मनीकडून २-३ असा पराभूत झाला आणि अंतिम फेरी गाठू शकला नाही. पण कांस्यपदकाला संघाने गवसणी घालत भारतीयांना आनंदाचे काही क्षण दिले आहेत. यानंतर पंतप्रधान मोदींनी खेळाडूंना कॉल करत त्यांच्याशी संवाद साधला याचा व्हीडिओ व्हायरल होत आहे.
भारतीय हॉकी संघाशी फोनवर संवाद साधताना पंतप्रधान मोदी म्हणाले, ‘तुम्ही भारताचा गौरव केल्याबद्दल तुम्हा सर्वांचे खूप खूप अभिनंदन. तुम्ही ऑलिम्पिकमधील पराभवाची मालिका मोडली आहे. मला पूर्ण विश्वास आहे की तुम्ही भारतात हॉकीचा सुवर्णकाळ परत आणाल.
Paris Olympics 2024: नरेंद्र मोदी भारताच्या हॉकी संघाशी कॉलवर काय काय बोलले?
पीएम मोदी पुढे म्हणाले, ‘ही एक अशी कामगिरी आहे जी येणाऱ्या पिढ्यांसाठी अमूल्य असेल! भारतीय हॉकी संघाने ऑलिम्पिकमध्ये आपली चमकदार कामगिरी केली आणि कांस्यपदक पटकावून परत येणार आहे. हे आणखी विशेष आहे कारण ऑलिम्पिकमधले हे त्याचे सलग दुसरे पदक आहे. त्यांचे यश कौशल्य, संयम आणि सांघिक भावनेचा विजय आहे. तुम्ही मोठे धाडस आणि जिद्द दाखवली. खेळाडूंचे अभिनंदन. प्रत्येक भारतीयाचं हॉकीशी भावनिक नातं आहे आणि या कामगिरीमुळे हा खेळ आपल्या देशातील तरुणांमध्ये अधिक लोकप्रिय होईल.”
भारताचे पंतप्रधान नरेंद्र मोदी यांनी भारतीय संघाचा गोलरक्षक पीआर श्रीजेश यांच्याशीही खास चर्चा केली. श्रीजेशने जरी निवृत्ती घेतली असली तरी त्याला भविष्यासाठी नवी टीम इंडिया तयार करावी लागेल, असेही त्यांनी आवर्जून सांगितले. पंतप्रधान मोदींनी श्रीजेशला आवाहन करत त्याच्यावर ही मोठी जबाबदारी दिली आहे. १० खेळाडूंसह ग्रेट ब्रिटनविरुद्ध विजयाची नोंद करण्यात हा संघ कसा यशस्वी ठरला याबद्दल त्यांनी टीम इंडियाचे अभिनंदनही केले. भारतातील प्रत्येक मुलाला हा ऐतिहासिक विजय स्मरणात राहील, असे पंतप्रधान मोदी म्हणाले.
