India W vs Ireland W Register Highest 435 ODI Total: भारतीय महिला क्रिकेट संघाने आयर्लंडविरुद्धच्या तिसऱ्या एकदिवसीय सामन्यात इतिहास रचला. टीम इंडियाने वनडे क्रिकेटमध्ये पहिल्यांदाच ४०० धावांचा आकडा गाठला. भारताची यापूर्वीची सर्वोच्च धावसंख्या ३७० होती. परंतु राजकोट येथे स्मृती मानधना आणि प्रतिका रावल यांच्या शतकांच्या जोरावर टीम इंडियाने ४०० धावांचा टप्पा गाठला. भारताने ५० षटकांत ५ बाद ४३५ धावा केल्या आहेत.
वनडे क्रिकेटच्या इतिहासातील भारतीय पुरूष आणि महिला संघांमध्ये ही सर्वांत मोठी धावसंख्या आहे. यापूर्वी भारताच्या पुरूष संघाने ५ बाद ४१८ धावा वेस्ट इंडिजविरूद्ध २०११ मध्ये केल्या होत्या. एकदिवसीय क्रिकेटमध्ये भारताच्या लेकींनी नवा इतिहास रचला. मानधनाने ८० चेंडूत १२ चौकार आणि ७ षटकारांच्या मदतीने १३५ धावांची खेळी केली, तर प्रतिका रावलने सहाव्या एकदिवसीय सामन्यात १५४ धावांची खेळी खेळून आश्चर्यकारक कामगिरी केली.
हेही वाचा – Smriti Mandhana Century: स्मृती मानधनाचं वादळी शतक! वनडेमध्ये ‘ही’ कामगिरी करणारी पहिली भारतीय फलंदाज
भारताच्या महिला संघाने पहिल्यांदाच गाठला ४०० धावांचा आकडा
सलामी जोडीच्या शानदार शतकी खेळीमुळे भारतीय महिला क्रिकेट संघ ५० षटकांत ५ गडी गमावून ४३५ धावा करण्यात यशस्वी ठरला, जी वनडे क्रिकेटमधील भारताची आतापर्यंतची सर्वोच्च धावसंख्या आहे. यापूर्वी, भारतीय महिला संघाची सर्वोच्च वनडे धावसंख्या ३७० धावा होती, जी आयर्लंडविरुद्धच्या याच मालिकेतील दुसऱ्या सामन्यात आली होती.
भारताच्या पुरूष क्रिकेट संघालाही महिला संघाने टाकलं मागे
महिला वनडे क्रिकेटच्या इतिहासातील ही चौथी सर्वोच्च धावसंख्या आहे. टीम इंडियाने ऑस्ट्रेलियाचा २८ वर्ष जुना विक्रम मोडित काढला. ऑस्ट्रेलियाने १९९७ मध्ये ३ गडी गमावून ४१२ धावा केल्या होत्या तर २०१८ मध्ये न्यूझीलंडने ४१३ धावा केल्या होत्या. यासह भारताने ४३५ धावा करत न्यूझीलंड आणि ऑस्ट्रेलियालाही मागे टाकलं. इतकंच नव्हे तर भारताच्या चॅम्पियन पुरूष संघालाही महिला संघाने मागे टाकलं आहे. एकदिवसीय क्रिकेटमध्ये भारतीय पुरुष क्रिकेट संघाची सर्वात मोठी धावसंख्या ४१८/५ धावा आहे. पुरूष संघाने २०११ मध्ये इंदूरमध्ये वेस्ट इंडिजविरुद्ध ही धावसंख्या केली होती. आता भारतीय महिला क्रिकेट संघ या बाबतीत पुरुष संघाच्या पुढे गेला आहे.
हेही वाचा – IND vs ENG: भारत वि इंग्लंड टी-२० मालिकेचं संपूर्ण वेळापत्रक एकाच क्लिकवर! जाणून घ्या सामन्याची नेमकी वेळ
भारताची वनडेमधील सर्वाेच्च धावसंख्या (पुरूष आणि महिला क्रिकेट संघ)
भारतीय महिला संघ – ५ बाद ४२३ धावा वि. आयर्लंड, राजकोट २०२५
भारतीय पुरूष संघ – ५ बाद ४१८ धावा वि. वेस्ट इंडिज, इंदोर २०११
भारतीय पुरूष संघ – ७ बाद ४१४ धावा वि. श्रीलंका, राजकोट २००९
भारतीय पुरूष संघ – ५ बाद ४१३ धावा वि. बर्मुडा, पोर्ट ऑफ स्पेन २००७
भारतीय पुरूष संघ – ४ बाद ४१० धावा वि. नेदरलँड्स, बंगळुरू २०२३
© IE Online Media Services (P) Ltd