ऋषभ पंत विश्वचषकासाठी संघात हवाच – मोहम्मद अझरुद्दीन

“जर भारत 2019 चा विश्वचषक जिंकू शकला नाही तर ती एक दुर्भाग्यपूर्ण गोष्ट असेल. विश्वचषक पुन्हा भारतात आणण्यासाठी भारतीय संघाकडे सर्व प्रकारच्या सुविधा आहेत. भारताने ऋषभ पंतला अंतिम 11 जणांच्या संघात जागा देऊन त्याला चौथ्या क्रमांकावर फलंदाजीसाठी पाठवायला हवं. मात्र भविष्यामध्ये कसोटी क्रिकेटचा विचार केला असता ऋषभला आपल्या यष्टीरक्षण कौशल्यात बदल करण्याची गरज आहे.” अझरुद्दीन मिड-डे वृत्तपत्राला दिलेल्या मुलाखतीत बोलत होता.

आंतरराष्ट्रीय क्रिकेटमध्ये ऋषभ पंतच्या नावावर 9 कसोटी, 3 वन-डे आणि 13 टी-20 सामन्यांचा अनुभव आहे. नुकत्याच झालेल्या न्यूझीलंडविरुद्ध टी-20 मालिकेत त्याला संघात संधी देण्यात आली होती, जिचा पंतने चांगला वापर केला. विश्वचषकाआधी भारतीय संघाला घरच्या मैदानावर ऑस्ट्रेलियाशी 2 टी-20 आणि 5 वन-डे सामन्यांची मालिका खेळायची आहे. त्यामुळे या सर्व सामन्यांमध्ये ऋषभ पंतला संधी मिळते का हे पाहणं महत्वाचं ठरणार आहे.