कर्णधार विराट कोहली आणि अजिंक्य रहाणे यांच्यातील शतकी भागीदारीच्या जोरावर भारताने पहिल्या वन-डे मालिकेत दक्षिण आफ्रिकेवर ६ गडी राखून विजय मिळवला. आफ्रिकेने दिलेल्या २७० धावांचा पाठलाग करताना भारतीय कर्णधार विराट कोहलीने आक्रमक शतकी खेळी केली. विराटने या सामन्यात आपला फलंदाजीचा फॉर्म कायम ठेवत ११२ धावा काढल्या. अखेरच्या षटकात फटकेबाजी करण्याच्या नादात विराट झेलबाद झाला. त्याला दुसऱ्या बाजूने अजिंक्य रहाणेने संयमी खेळी करुन चांगली साथ दिली. या दोघांमध्येही तिसऱ्या विकेटसाठी १८९ धावांची शतकी भागीदारी झाली. सामना जिंकण्यासाठी अवघ्या काही धावांची आवश्यकता असताना अजिंक्य रहाणेचा अडसर दूर करण्यात आफ्रिकेच्या गोलंदाजांना यश आलं, मात्र तोपर्यंत भारताने सामन्यात आपली बाजू भक्कम केली होती. त्याआधी भारतीय सलामीवीरांनी डावाची सुरुवात अतिशय आक्रमक पद्धतीने केली होती. मात्र रोहित शर्मा मोठा फटका खेळण्याच्या नादात तर शिखर धवन चोरटी धाव घेण्याच्या प्रयत्नान धावबाद होऊन माघारी परतला. यानंतर भारतीय संघ कसोटी क्रिकेटप्रमाणे पुन्हा अडचणीत सापडणार असं वाटत असतानाच विराट कोहली आणि अजिंक्य रहाणेच्या शतकी भागीदारीने भारताचा विजय सोपा केला. दक्षिण आफ्रिकेचे गोलंदाज आज भारतीय फलंदाजांवर अंकुश लावू शकले नाही. कसोटी क्रिकेटमध्ये चांगली कामगिरी करणाऱ्या मॉर्कल, रबाडा, फेलुक्वायो या सर्व गोलंदाजांना आज भारतीय फलंदाजांच्या फटकेबाजीचा सामना करावा लागला. मॉर्कल आणि फेलुक्वायो या गोलंदाजांना सामन्यात १-१ यश मिळालं. याव्यतिरीक्त अन्य गोलंदाजांकडून पुरती निराशा पहायला मिळाली. अखेर अजिंक्य रहाणे आणि विराट कोहलीला माघारी परतल्यानंतर विजयासाठी आवश्यक असणाऱ्या औपचारिकता हार्दिक पांड्या आणि महेंद्रसिंह धोनी जोडीने पूर्ण केली. या विजयासह भारताने ६ वन-डे सामन्यांच्या मालिकेत १-० अशी आघाडी घेतली आहे. त्याआधी आफ्रिकेने कर्णधार फाफ डु प्लेसिसच्या शतकी खेळीच्या जोरावर भारतासमोर २७० धावांचं लक्ष्य ठेवलं. पहिल्याच सामन्यात आफ्रिकेचे फलंदाज भारताच्या फिरकीपटूंचा सामना करु शकले नाहीत. चांगल्या सुरुवातीनंतर आफ्रिकेचे एकामागोमाग एक फलंदाज माघारी परतत राहिले. अखेर कर्णधार डु प्लेसिसने ख्रिस मॉरिस आणि तळातल्या फलंदाजांना हाताशी धरुन आफ्रिकेला आश्वासक धावसंख्या गाठून दिली. भारताकडून कुलदीप यादवने ३ तर युझवेंद्र चहलने २ बळी घेतले. पहिल्या सामन्यात भारत ६ गडी राखून विजयी, मालिकेत १-० ने आघाडी विजयाची औपचारिकता महेंद्रसिंह धोनीकडून पूर्ण विराट कोहलीला माघारी धाडण्यात आफ्रिकेला यश, भारताला चौथा धक्का अजिंक्य रहाणेच्या ७९ धावा, तिसऱ्या विकेटसाठी विराट कोहलीसोबत १८९ धावांची भागीदारी अजिंक्य रहाणे माघारी, भारताचा तिसरा गडी माघारी विराट कोहलीपाठोपाठ अजिंक्य रहाणेचंही अर्धशतक, भारत विजयाच्या जवळ विराट कोहली - अजिंक्य रहाणेमध्ये शतकी भागीदारी दुसऱ्या बाजूने अजिंक्य रहाणेचीही विराट कोहलीला उत्तम साथ कर्णधार विराट कोहलीचं अर्धशतक दोघांच्या सावध खेळीमुळे भारताने ओलांडला १०० धावसंख्येचा टप्पा अजिंक्य रहाणे - विराट कोहलीने भारताचा डाव सावरला भारताला पहिला धक्का, यष्टीरक्षक क्विंटन डी कॉकने पकडला रोहित शर्माचा झेल मात्र मॉर्ने मॉर्कलच्या गोलंदाजीवर मोठा फटका खेळण्याच्या नादात रोहित शर्मा माघारी रोहित शर्मा आणि शिखर धवन जोडीकडून भारतीय डावाची आक्रमक सुरुवात ५० षटकात दक्षिण आफ्रिका २६९/८, भारताला विजयासाठी २७० धावांचं आव्हान वाईट बॉलवर धाव काढण्याच्या प्रयत्नात कगिसो रबाडा धावबाद, आफ्रिकेचा आठवा गडी माघारी १२० धावा काढून भुवनेश्वर कुमारच्या गोलंदाजीवर डु प्लेसिस माघारी अखेरच्या षटकात कर्णधार फाफ डु प्लेसिस माघारी, आफ्रिकेला सातवा धक्का एका बाजूने आफ्रिकेच्या डावाची खिंड लढवणाऱ्या कर्णधार फाफ डू प्लेसिसचं शतक आफ्रिकेने ओलांडला २०० धावांचा टप्पा कुलदीप यादवच्या गोलंदाजीवर ख्रिस मॉरिस त्रिफळाचीत होऊन माघारी, आफ्रिकेला सहावा धक्का अखेर आफ्रिकेची जमलेली जोडी फोडण्यात भारताला यश दोघांमध्ये सहाव्या विकेटसाठी अर्धशतकी भागीदारी, आफ्रिकेने ओलांडला १५० धावांचा टप्पा ख्रिस मॉरिस आणि कर्णधार फाफ डु प्लेसिसने दक्षिण आफ्रिकेचा डाव सावरला आफ्रिकेचा निम्मा संघ माघारी, कुलदीप यादवच्या गोलंदाजीवर डेव्हिड मिलर माघारी कर्णधार फाफ डु प्लेसिसचा लढा सुरुच, फिरकीपटूंचा सामना करत झळकावलं संयमी अर्धशतक जे. पी. ड्यूमिनी अडसर दूर करण्यात भारताला यश, कुलदीप यादवच्या गोलंदाजीवर ड्युमिनी त्रिफळाचीत आफ्रिकेचा तिसरा गडी माघारी एडन मार्क्रम चहलच्या गोलंदाजीवर हार्दिक पांड्याकडे झेल देत माघारी आफ्रिकेने ओलांडला १०० धावसंख्येचा टप्पा डी-कॉक आणि डु प्लेसिसमध्ये दुसऱ्या विकेटसाठी ५३ धावांची अर्धशतकी भागीदारी क्विंटन डी कॉक युझवेंद्र चहलच्या गोलंदाजीवर पायचीत, आफ्रिकेला दुसरा धक्का डी-कॉक - डु प्लेसिस जोडी फोडण्यात भारताला यश डी-कॉक आणि कर्णधार डु प्लेसिस जोडीने आफ्रिकेचा डाव सावरला, आफ्रिकेने ओलांडला ५० धावसंख्येचा टप्पा जसप्रीत बुमराहच्या गोलंदाजीवर हाशिम आमला पायचीत, आफ्रिकेला पहिला धक्का हाशिम आमलाचा अडसर दूर करण्यात भारताला यश हाशिम आमला आणि क्विंटन डी कॉक जोडीकडून आफ्रिकेच्या डावाची सावध सुरुवात अजिंक्य रहाणेला संघात जागा, चौथ्या क्रमांकावर फलंदाजी मिळण्याची शक्यता आफ्रिकेने नाणेफेक जिंकली, प्रथम फलंदाजी करण्याचा निर्णय
