ड्रेसिंगरुममधे जाडेजाकडून श्रीलंकन गोलंदाजाची नक्कल

गॉल कसोटीच्या पहिल्या दिवशी भारतीय फलंदाजांनी श्रीलंकेच्या गोलंदाजांची अक्षरशः पिसं काढली. सलामीवीर शिखर धवन पाठोपाठ चेतेश्वर पुजारानेही शतक झळकावत लंकेच्या गोलंदाजांना अक्षरशः जेरीस आणलं. भारताच्या फलंदाजांना बाद करण्यासाठी श्रीलंकेचा कर्णधार रंगना हेरथने सर्वप्रकारे प्रयत्न करुन पाहिले, मात्र नुवान प्रदीपचा अपवाद वगळता पहिल्या दिवशी कोणालाही यश मिळालं नाही. मग रंगना हेरथने दिलरुवान पेरेराचा पर्यायही आजमावून पाहिला, मात्र त्यालाही यश मिळालं नाही.

याचदरम्यान जाडेजाने दिलरुवानच्या अनोख्या शैलीतल्या गोलंदाजीची नक्कल केली. ज्याला भारताचे प्रशिक्षक रवी शास्त्री, सहाय्यक प्रशिक्षक संजय बांगर आणि कर्णधार विराट कोहली यांनीही भरभरुन दाद दिली. पहिल्या दिवशी दिलरुवान पेरेराने २५ षटक टाकली, मात्र त्याला एकही भारतीय फलंदाजाला बाद करता आलं नाही.

पहिल्या कसोटीत पुजारा आणि धवनच्या शतकामुळे भारत मजबूत स्थितीत असल्यामुळे, दुसऱ्या दिवशी भारतीय फलंदाजांना लवकर बाद करण्यात श्रीलंकेचे गोलंदाज यशस्वी ठरतात का हे पहावं लागेल.