कर्णधारपदाचे पदार्पण शतकासह झोकात साजरा करणारा विराट कोहली हा भारताचा तिसरा कसोटीपटू ठरला आहे. त्यामुळेच ऑस्ट्रेलियाच्या आभाळाएवढय़ा धावसंख्येला भारताने तितक्याच ताकदीने प्रतिकार केला. तिसऱ्या दिवसाचा खेळ थांबला, तेव्हा भारताच्या खात्यावर समाधानकारक ५ बाद ३६९ धावा जमा होत्या.
महेंद्रसिंग धोनीच्या अनुपस्थितीत भारताचे नेतृत्व करणाऱ्या कोहलीने पदार्पणात शतक झळकावून विजय हजारे आणि सुनील गावस्कर या भारतीयांच्या पंक्तीत स्थान मिळवले आहे. कोहलीने १८४ चेंडूंत १२ चौकारांसह आपली दिमाखदार खेळी केली. आपल्या खेळीत त्याने तीन महत्त्वाच्या भागीदाऱ्या केल्या. तिसऱ्या विकेटसाठी त्याने पुजारासोबत ८१ धावांची, चौथ्या विकेटसाठी अजिंक्य रहाणेसोबत १०१ धावांची आणि पाचव्या विकेटसाठी रोहित शर्मासोबत ७४ धावांची भागीदारी केली.
२६ वर्षीय कोहलीने गुरुवारी भारतीय फलंदाजीची आघाडी समर्थपणे सांभाळताना सातवे शतक साकारले. दिवसाच्या अखेरच्या सत्रात ९५व्या षटकात मिचेल जॉन्सनचा आखूड टप्प्याचा चेंडू फटकावण्याच्या प्रयत्नात ११५ धावांवर त्याची खेळी आटोपली. डीप फाइन लेगला रयान हॅरिसने त्याचा झेल टिपला. खेळ थांबला तेव्हा भारताचा किल्ला लढवणारा रोहित शर्मा ३३ आणि वृद्धिमान साहा १ धावांवर खेळत होते.
सकाळच्या सत्रात ऑस्ट्रेलियाने दुसऱ्या दिवसअखेरच्या ७ बाद ५१७ धावसंख्येवरच पहिला डाव घोषित केला. पावसामुळे बुधवारी चार तासांचा खेळ वाया गेला होता. त्यामुळे गुरुवारी खेळाला लवकर सुरुवात करण्यात आली. निरभ्र सूर्यप्रकाशात कोहलीची फलंदाजी आणि भारताची धावसंख्या निर्धाराने वाटचाल करीत होती, परंतु तो बाद झाल्यामुळे ऑस्ट्रेलियाला दिलासा मिळाला आहे.
डावाच्या सुरुवातीला आठव्याच षटकात सलामीवीर शिखर धवन (२५) तंबूत परतला, परंतु भारताच्या आघाडीच्या फळीने मात्र संयमी खेळ करीत साडेतीनशेच्या पलीकडे मजल मारली.
पहिल्या सत्रात मुरली विजयने (५३) आपले सातवे कसोटी अर्धशतक पूर्ण केले. मग दुसऱ्या सत्रात पुजाराने (७३) सहावे अर्धशतक नोंदवले, त्यानंतर तिसऱ्या सत्रात कोहलीने प्रेरणादायी शतकी खेळी उभारली. याच सत्रात रहाणेनेही (६२) आपले पाचवे कसोटी अर्धशतक साकारले.
वेगवान गोलंदाज मिचेल जॉन्सनला बळी मिळवण्यासाठी झगडावे लागले. त्याच्या १८ षटकांत भारतीय फलंदाजांनी ९० धावा काढल्या. कोहलीचा अडसर दूर करण्यात मात्र जॉन्सनची भूमिका महत्त्वाची होती. फिरकीपटू नॅथन लिऑननेही दोन बळी मिळवण्यात यश मिळवले, परंतु त्यासाठी ३० षटकांत त्याने १०३ धावा दिल्या.
भुवनेश्वरच्या जागी धवलला संधी
ऑस्ट्रेलियाच्या दौऱ्यातील गोलंदाज भुवनेश्वर कुमार जायबंदी झाला असून त्याच्या जागी मुंबईच्या धवल कुलकर्णीची निवड करण्यात आली आहे. पण भुवनेश्वर दुखापतीतून सावरला तर त्याला पुन्हा संघात सामील करण्यात येईल. ‘‘धवल ऑस्ट्रेलियासाठी शनिवारी रवाना होणार असून त्याची व्हिसा प्रक्रिया सुरू आहे. भुवनेश्वर कुमारला दुखापत झाल्याने त्याच्या जागी धवल ऑस्ट्रेलियाला जाणार आहे. भुवनेश्वरच्या घोटय़ाला दुखापत झाली असून त्याला मायदेशी परतणार आहे,’’ असे भारतीय क्रिकेट नियामक मंडळाचे (बीसीसीआय) सचिव संजय पटेल यांनी सांगितले.
बुधवारीच आम्ही ऑस्ट्रेलियाला तोडीस तोड उत्तर कसे द्यायचे याबाबत धोरण निश्चित केले होते. ही खेळपट्टी कशी आहे आणि ऑस्ट्रेलियाने केलेल्या धावसंख्येचा यशस्वी पाठलाग कसा करायचा, याबाबतही चर्चा केली होती. एकदंरीत पाहता आम्ही चांगली कामगिरी केली. युवा फलंदाजांनी स्वत:ला सिद्ध केले. सामन्यात आमची चांगली स्थिती असून धावांचे लक्ष्य गाठण्याच्या जवळ आहोत.
चेतेश्वर पुजारा, भारताचा फलंदाज
धावफलक
ऑस्ट्रेलिया (पहिला डाव) : ७ बाद ५१७ (डाव घोषित)
भारत (पहिला डाव) : मुरली विजय झे. हॅडिन गो. जॉन्सन ५३, शिखर धवन त्रिफळा गो. हॅरिस २५, चेतेश्वर पुजारा त्रिफळा गो. लिऑन ७३, विराट कोहली झे. हॅरिस गो. जॉन्सन ११५, अजिंक्य रहाणे झे. वॉटसन गो. लिऑन ६२, रोहित शर्मा खेळत आहे ३३, वृद्धिमान साहा खेळत आहे १, अवांतर (लेगबाइज ४, वाइड १, नोबॉल २) ७, एकूण ९७ षटकांत ५ बाद ३६९
बाद क्रम : १-३०, २-१११, ३-१९२, ४-२९३, ५-३६७
गोलंदाजी : मिचेल जॉन्सन १८-५-९०-२, रयान हॅरिस १७-५-४९-१, नॅथन लिऑन ३०-३-१०३-२, पीटर सिडल १३-२-६२-०, मिचेल मार्श ११-४-२९-०, शेन वॉटसन ५-१-१३-०, स्टीव्ह स्मिथ ३-०-१९-०.
