नवी मुंबई : यावर्षी होणाऱ्या ट्वेन्टी-२० विश्वचषक स्पर्धेकडे पाहता भारतीय महिला क्रिकेट संघाचा ऑस्ट्रेलियाविरुद्ध शुक्रवारपासून सुरू होणाऱ्या तीन सामन्यांच्या ट्वेन्टी-२० मालिकेत सर्वच विभागांतील कामगिरी सुधारण्यावर भर राहील. हरमनप्रीत कौरच्या नेतृत्वाखालील भारतीय संघाने नुकतीच झालेली ऑस्ट्रेलियाविरुद्धची एकदिवसीय मालिका ०-३ अशी गमवली. तर त्यापूर्वी इंग्लंडविरुद्धच्या ट्वेन्टी-२० मालिकेतही भारतीय संघाला हार पत्करावी लागली होती. भारताने इंग्लंड व ऑस्ट्रेलियाविरुद्ध कसोटी सामन्यांत विजय मिळवला. मात्र, मर्यादित षटकांच्या क्रिकेटमध्ये त्यांनी कामगिरी उंचावणे गरजेचे आहे.
हेही वाचा >>> IND vs SA 2nd Test : आयसीसीच्या दुटप्पी वृत्तीवर रोहित शर्मा संतापला; म्हणाला, ‘देश पाहून खेळपट्टीला रेटिंग…’
ऑस्ट्रेलियाविरुद्धच्या दुसऱ्या एकदिवसीय सामन्यात भारताने तब्बल सात झेल सोडले होते व त्यांना तीन धावांनी पराभूत व्हावे लागले होते. तर, तिसऱ्या सामन्यात ऑस्ट्रेलियाने ८ बाद ३३८ धावा केल्या होत्या. मात्र, मोठया धावसंख्येचा पाठलाग करण्याच्या दडपणाखाली भारतीय फलंदाजांचा खेळ ढेपाळला आणि भारताचा डाव १४८ धावांतच आटोपला.
भारतासाठी कर्णधार हरमनप्रीतची कामगिरी चिंतेचा विषय ठरत आहे. ऑस्ट्रेलियाविरुद्धच्या तीन एकदिवसीय सामन्यांत मिळून तिला केवळ १७ धावाच करता आल्या. जेमिमा रॉड्रिग्ज व रिचा घोष यांनी चांगली कामगिरी केली, पण त्यांना अन्य फलंदाजांची साथ मिळाली नाही. दुसरीकडे, ऑस्ट्रेलियाच्या फिबी लिचफील्ड व ताहलिया मॅकग्रा यांनी सातत्यपूर्ण कामगिरी केली आहे व भारतीय गोलंदाजांसमोर त्यांना रोखण्याचे आव्हान असेल. एकमेव कसोटी सामना गमावल्यानंतर ऑस्ट्रेलियाने जोरदार पुनरागमन केले. लिचफील्डने एकदिवसीय मालिकेत एक शतक व दोन अर्धशतके केली. विश्वचषकाच्या दृष्टीने ही मालिका महत्त्वाची आहे. ट्वेन्टी-२० विश्वचषक यंदा बांगलादेशमध्ये होणार असून एकदिवसीय विश्वचषकाचे आयोजन २०२५मध्ये भारतात होणार आहे.
उभय संघांमध्ये आतापर्यंत झालेल्या ३१ ट्वेन्टी-२० सामन्यांपैकी केवळ सहा सामन्यांत भारताला विजय मिळवता आला आहे, तर २३ सामन्यांत त्यांनी हार पत्करली आहे. एक सामना रद्द करण्यात आला होता.
’ वेळ : सायं. ७ वा.
’ थेट प्रक्षेपण : स्पोर्ट्स १८-१, जिओ सिनेमा
स्मृती, रेणुकावर भिस्त
एकदिवसीय मालिकेत सलामीवीर स्मृती मनधानाला चांगल्या सुरुवातीचे मोठया खेळीत रूपांतर करता आले नाही. मात्र, ट्वेन्टी-२० मालिकेत भारताला आक्रमक सुरुवात करून देण्याची जबाबदारी मनधानावर असेल. एकदिवसीय मालिकेत मनधानासह यास्तिका भाटियाने डावाची सुरुवात केली. मात्र, ट्वेन्टी-२० मालिकेत शफाली वर्माचे पुनरागमन अपेक्षित आहे. भारताच्या गोलंदाजीची भिस्त रेणुका सिंह ठाकूर व पूजा वस्त्रकार यांच्यावर असेल. नवी मुंबई येथील डॉ. डी. वाय. पाटील स्टेडियमच्या नवीन खेळपट्टीकडून त्यांना मदत मिळण्याची दाट शक्यता आहे.
