केंद्रीय क्रीडा मंत्रालयाकडून मान्यता काढून घेतली जाईल या भीतीने भारतीय अ‍ॅथलेटिक्स महासंघाने घटनादुरुस्ती करीत अध्यक्ष, सचिव आदी पदांसाठी २४ फेब्रुवारी रोजी पुन्हा निवडणूक घेण्याचा निर्णय घेतला आहे.
महासंघाचे अध्यक्ष आदिल सुमारीवाला यांनी येथे ही माहिती दिली. महासंघाच्या अध्यक्ष, सचिव आदी वरिष्ठ पदासांठी सध्याच्या कार्यकारिणीतील सदस्यालाच उभे राहता येईल हा नियम काढून टाकण्यात आला आहे. येथे झालेल्या महासंघाच्या विशेष सर्वसाधारण सभेत ही घटना दुरुस्ती करण्यात आल्याचे सुमारीवाला यांनी सांगितले.
वरिष्ठ पदांसाठी यापूर्वी निवडणूक घेण्यात आली होती मात्र या संदर्भात काही आक्षेप घेण्यात आल्यानंतर केंद्रीय क्रीडा मंत्रालयाने ही निवडणूक पुन्हा घ्यावी अन्यथा संस्थेची मान्यता काढून घेतली जाईल, असा इशारा दिल्यानंतर महासंघाने तातडीने घटना दुरुस्ती करीत पुन्हा निवडणूक घेण्याचा निर्णय घेतला.