Indian Cricketers Video Viral Before WTC Final 2023 : आयपीएल २०२३ ची सांगता होण्यासाठी अवघ्या दोन दिवसांचा कालावधी राहिला आहे. त्यानंतर टीम इंडियाचे उर्वरित खेळाडू इंग्लंडला रवाना होणार आहेत. भारत आणि ऑस्ट्रेलिया यांच्यात ७ जूनपासून वर्ल्ड टेस्ट चॅम्पियनशिपचा फायनल सामना सुरु होणार आहे. या महत्वाच्या सामन्यासाठी आयपीएलच्या प्ले ऑफच्या सामन्यांआधी टीम इंडियाचा पहिला ग्रुप इंग्ल्डला पोहोचला आहे. विराट कोहली नुकताच इंग्लडला पोहोचला असून त्याने सोशल मीडियावर याबाबत माहिती दिलीय.
बीसीसीआयने टीम इंडियासाठी नवीन किटबाबतही घोषणा केली. त्यानंतर काही भारतीय खेळाडूंनी किट घातल्याचं पाहायला मिळालं. अशातच आता या फायनल सामन्याआधी टीम इंडियाचे खेळाडू एक अनोखा खेळ खेळत असल्याचं समोर आलं आहे. ड्रिल मैदानावरील भारतीय खेळाडूंचा हा व्हिडीओ बीसीसीआयने त्यांच्या ट्वीटर अकाऊंटवर शेअर केला आहे आणि कॅप्शनमध्ये लिहिलंय, तुमच्या मित्रांना बोलवा. एक घेराव करा आणि या ड्रिलची नक्कल करा आणि याची मजा घ्या. या ड्रिलमध्ये अक्षर पटेल, शार्दुल ठाकूर आणि उमेश यादवसह कोचिंग स्टाफचे तीन सदस्य एक घेराव बनवत असल्याचं पाहायला मिळत आहे. सर्व खेळाडू सतत एकमेकांकडे चेंडू फेकताना या व्हिडीओत दिसत आहेत. ही ड्रिल खूप जबरदस्त असून हा व्हिडीओ सोशल मीडियावर तुफान व्हायरल झाला आहे.
इथे पाहा व्हिडीओ
बीसीसीआयने सोशल मीडियावर फोटोज अपलोड करून लिहिलं की, टीम इंडियाच्या नवीन कीटचं उद्घाटनासह वर्ल्ड टेस्ट चॅम्पियनशिपच्या फायनलची तयारीच्या शुभारंभही होत आहे. यावेळी भारतीय टीमचा कोचिंग स्टाफ ज्यामध्ये राहुल द्रविड, विक्रम राठोडसह इतरही कोच उपस्थित होते. तसंच उमेश यादव, शार्दुल ठाकूरसह संघाचे इतर खेळाडू हजर असल्याचं शेअर केलेल्या फोटोंच्या माध्यमातून समोर आलं.
