INDW vs PAKW T20 WC Highlights: जेमिमाह रॉड्रिग्स-रिचा घोषची अफलातून फलंदाजी! भारताने पाकिस्तानवर सात विकेट्सने केली मात

जेमिमाह रॉड्रिग्स-रिचा घोषच्या अफलातून फलंदाजीच्या जोरावर भारतीय महिलांनी विश्वचषकातील पहिला विजय नोंदवला. पाकिस्तानच्या नांग्या ठेचल्या.

भारत १५१-३

भारताला १८ चेंडूत २८ धावांची गरज असून ही जोडी टिकून राहणे आवश्यक आहे. सामना रोमांचक स्थितीत आला आहे.

भारत १२२-३

मोठे फटके मारण्याच्या नादात यष्टीरक्षक रिचा घोष बाद झाली होती मात्र रिव्ह्यू घेतल्यानंतर त्यात कळले की चेंडू ग्लोव्हजला लागला होता आणि त्यात ती नाबाद ठरली.

भारत १०९-३

शफाली वर्मा बाद झाल्यानंतर जेमिमाह रॉड्रिग्स-हरमनप्रीत जोडीने भारताचा डाव सावरला होता त्यांच्यात २८ धावांची भागीदारी झाली होती पण ती फोडण्यात नशरा संधूला फोडण्यात यश आले. कर्णधार हरमनप्रीत कौर १६ धावा करून बाद झाली.

भारत ९३-३

नशरा संधूच्या गोलंदाजीवर जेमिमाह रॉड्रिग्स यष्टीचीत होता होता वाचली. भारताला मोठ्या भागीदारीची गरज असून कर्णधार हरमनप्रीत कौरने धावा करणे गरजेचे आहे.

भारत ७३-२

अंडर-१९ वर्ल्डकप विजेती शफाली वर्मा बाद झाली असून हा भारताला मोठा धक्का बसला आहे. तिने २५ चेंडूत ३३ धावा करून बाद झाली. नशरा संधूने बाद करत सिद्रा अमीनने अफलातून झेल घेतला.

भारत ६५-२

पाकिस्तानने ठेवलेल्या १५० धावांचा पाठलाग करताना भारताची चांगली सुरुवात झाली होती. मात्र यास्तिका भाटिया मोठा फटका मारण्याच्या नादात बाद झाली. तिने १७ धावा केल्या आणि तिला सादिया इक्बालने झेलबाद केले.

भारत ३८-१

सादियाच्या षटकात भारताची सलामीवीर शफाली वर्मा विरुद्ध पायचीतचे अपील केले असता अंपायरने बाद दिले होते मात्र तिने रिव्ह्यू घेत बॉल ट्रॅकिंगमध्ये ती नाबाद ठरली आणि सगळ्यांच्या जीवात जीव आला.

भारत २७-०

सलामीवीर यास्तिका भाटियाने अप्रतिम चौकार मारत चांगली सुरुवात केली. भारताला ती टिकवून ठेवणे गरजेचे आहे.

भारत ५-०

पाकिस्तानने कर्णधार बिस्माह मारुफने शानदार अर्धशतक करत संघाला १४९ पर्यत नेऊन ठेवले. आता भारताला विजयासाठी १५० धावा करायच्या असून कशी सुरुवात करतो ते पाहणे उत्सुकतेचे ठरणार आहे.

पाकिस्तान १४९-४

एका बाजूला पाकिस्तान मोठे फटके मारत असताना आज भारतीय खेळाडूंनी गचाळ क्षेत्ररक्षण करत त्याच्या धावसंख्येत भर घातली असे म्हटले तर वावगं ठरणार नाही. आयशा नसीमचा झेल सोडत राधा यादव टीकेचा धनी होत आहे. पुढच्याच चेंडूवर हरलीनने झेल सोडला.

पाकिस्तान १४५-४

रेणुका ठाकूरने १६व्या षटकात १८ धावा कुटल्या. आयशा नसीम आणि बिस्माह मारूफ यांनी आधीच पाचव्या विकेटसाठी ५० धावांची भागीदारी केली आहे. आयशा ३३ धावा आणि बिस्माह मारूफने ४५चेंडूत ५० धावा करून फलंदाजी करत आहे. त्याच षटकापासून मोमेंटम पाकिस्तानकडे शिफ्ट झाला.

पाकिस्तान १२९-४

कर्णधार बिस्माह मारुफने एक बाजू लावून धरत शानदार अर्धशतक झळकावले. ४५ चेंडूत ५० धावा करत खेळपट्टीवर टिकून आहे. तिला आयशा नसीम ३३ धावा करून साथ देत आहे.

पाकिस्तान १२०-४

आयशा नसीम आणि कर्णधार मारुफ यांनी शेवटच्या काही षटकात शानदार फटकेबाजीला सुरुवात केली असून भारताला विकेट्सची गरज आहे. लवकरात लवकर विकेट्स काढल्या नाहीत तर ह्या धावा महागात पडू शकतात.

पाकिस्तान १०६-३

पाकिस्तानला चौथा धक्का बसला असून सिद्रा अमीनला ११ धावांवर राधा यादवने रिचा घोषकरवी झेलबाद केले. एका बाजूने कर्णधार बिस्माह मारुफ तंबू ठोकून उभी आहे.

पाकिस्तान ६८-४

तीन विकेट्स लवकर पडल्यानंतर पाकिस्तानने डाव सावरला आहे. कर्णधार बिस्माह मारुफने एक बाजू लावून धरली असून एक-दोन धावा करत धावफलक हलता ठेवला आहे.

पाकिस्तान ५८-३

पाकिस्तानला तिसरा धक्का बसला असून भारताची वेगवान गोलंदाज पूजा वस्त्राकारने निदा दारला भोपळाही फोडू दिला नाही. एका बाजूला मारुफ अजूनही खेळपट्टीवर टिकून आहे. भारताची यष्टीरक्षक रिचा घोषने शानदार रिव्ह्यू घेतला.

पाकिस्तान ४३-३

राधा यादवला धोकादायक जोडी फोडण्यात यश आले. तिने मुनीबा अलीला १२ धावांवर यष्टिचीत करत पाकिस्तानला दुसरा धक्का दिला.

पाकिस्तान ४२-२

पहिल्या पॉवर प्ले मध्ये पाकिस्तानची सावध सुरुवात झाली असून कर्णधार बिस्माह मारुफ आक्रमक फलंदाजी करताना दिसत आहे. मात्र मुनीबा मात्र संथ खेळताना दिसत आहे. त्यात भारताचे ढिसाळ क्षेत्ररक्षण, ओवर थ्रो यामुळे अधिक धावा देत आहे.

पाकिस्तान ३९-१

टीम इंडियाचे आजच्या सामन्यात ढिसाळ क्षेत्ररक्षण दिसत असून जेवढे कमी धावा देईल तेवढे चांगले आहे. कारण नंतर धावांचा पाठलाग करताना फारसे सोपे नसणार आहे. पाकिस्तानची कर्णधार बिस्माह मारुफने आक्रमक सुरुवात करत गोलंदाजांवर दबाव टाकत आहेत.

पाकिस्तान २४-१

सामन्याच्या दुसऱ्याच षटकात दीप्ती शर्माने जवेरिया खानला कर्णधार हरमनप्रीतकरवी झेलबाद केले. तिने केवळ ६ चेंडूत ८ धावा केल्या.

पाकिस्तान १०-१

पाकिस्तानचे सलामीवीर मुनीबा अली आणि जवेरिया खान खेळपट्टीवर मैदानात आले आहेत. भारताकडून रेणुका ठाकूर गोलंदाजीला सुरुवात करणार आहे.

पाकिस्तान ०-०

भारत आणि पाकिस्तान या दोन्ही संघाचे खेळाडू राष्ट्रगीतासाठी मैदानात आले आहेत.

भारताची फलंदाजी हरमनप्रीतवर अवलंबून आहे. या दोघींना अंडर-१९ महिला टी२० विश्वचषक विजेती कर्णधार शफाली वर्माकडून चांगल्या पाठिंब्याची अपेक्षा असेल. जेमिमाह रॉड्रिग्जवर दडपण असेल कारण ती अलीकडच्या काळात चांगली कामगिरी करत नाहीये. त्याचबरोबर वेगवान गोलंदाजी अष्टपैलू पूजा वस्त्राकरची भूमिकाही महत्त्वाची ठरणार आहे. रिचा घोष ही अशी खेळाडू आहे जी डेथ ओव्हर्समध्ये संघासाठी झटपट धावा करू शकते.

“दुनिया जीत लो” असे म्हणत भारताची महिला स्टार मिताली राज ने शुभेच्छा दिल्या आहेत. मागील टी२० विश्वचषकात भारताकडून सर्वात चांगले प्रदर्शन तिने केले होते.

पाकिस्तान पूर्ण ताकदीनिशी या सामन्यात उतरणार हे त्याच्या अंतिम अकरा खेळाडूंवरून दिसून येते.

भारताची धडाकेबाज सलामीवीर स्मृती मंधाना दुखापतग्रस्त असल्याने आजच्या सामन्यात खेळणार नाही.

पाकिस्तानची कर्णधार बिस्माह मारुफने नाणेफेक जिंकत प्रथम फलंदाजी करण्याचा निर्णय घेतला.

भारतीय महिला क्रिकेट संघ आज कट्टर प्रतिस्पर्धी पाकिस्तानविरुद्ध केपटाऊनमधील न्यूलँड्स येथे आपल्या मोहिमेला सुरुवात करेन. त्यासाठी सर्व संघ मैदानात पोहचला असून सराव करत आहे.

भारत आणि पाकिस्तान यांच्यातील हा सामना न्यूलँड्स, केपटाऊन येथे होणार आहे. न्यूलँड्सची खेळपट्टी गोलंदाजांपेक्षा फलंदाजांना अधिक मदत करते. या खेळपट्टीवर झालेल्या शेवटच्या ५ महिला टी२० सामन्यांबद्दल बोलायचे झाल्यास, प्रथम फलंदाजी करणाऱ्या संघाने ३ सामने जिंकले आहेत तर नंतर फलंदाजी करणाऱ्या संघाने २ सामने जिंकले असून ह्या ठिकाणी मोठी धावसंख्या जास्त होतात.

या खेळपट्टीवर प्रथम फलंदाजी करणाऱ्या संघाची सरासरी धावसंख्या १२९ धावांची आहे. गेल्या ५ सामन्यांमध्ये या खेळपट्टीवर दोनदा १५० किंवा त्याहून अधिक धावा झाल्या आहेत. महिला क्रिकेटच्या दृष्टीने ही चांगली धावसंख्या आहे. या खेळपट्टीवर नाणेफेक जिंकल्यानंतर संघाला प्रथम गोलंदाजी करणे आवडते.