बंगळुरुच्या चिन्नास्वामी मैदानावर झालेल्या अटीतटीच्या सामन्यात मुंबई इंडियन्सने बंगळुरु रॉयल चॅलेंजर्सवर 6 धावांनी मात केली. बाराव्या हंगामातला मुंबई इंडियन्सचा हा पहिला विजय ठरला. एबी डिव्हीलियर्सने फटकेबाजी करत मुंबईच्या गोटात चिंतेचं वातावरण निर्माण केलं होतं. मात्र जसप्रीत बुमराहने 19 व्या षटकात भेदक मारा करत बंगळुरुचं आव्हान आणखी खडतर केलं. यानंतर अखेरच्या षटकात विजयासाठी आवश्यक असलेल्या 18 धावा पूर्ण करत बंगळुरुला जमलं नाही. बुमराहने आजच्या सामन्यात 3 बळी घेतले.
लसिथ मलिंगाच्या अखेरच्या षटकात मुंबईच्या शिवम दुबेने षटकार खेचत रंगत निर्माण केली होती. मात्र मलिंगाने आपला संपूर्ण अनुभव पणाला लावत मुंबईच्या विजयावर शिक्कामोर्तब केलं. एबी डिव्हीलियर्सने 70 धावांची खेळी केली. मात्र आपल्या संघाला विजय मिळवून देण्यात तो अपयशी ठरला. बंगळुरुकडून कर्णधार विराट कोहलीनेही चांगली फलंदाजी केली.
त्याआधी, युजवेंद्र चहलने मोक्याच्या क्षणी केलेला भेदक मारा आणि त्याला अन्य गोलंदाजांनी दिलेली साथ या जोरावर, बंगळुरुने घरच्या मैदानावर खेळत असताना मुंबई इंडियन्सला 187 धावांवर रोखलं.पहिल्यांदा फलंदाजी करण्याची संधी मिळालेल्या मुंबई इंडियन्सने डावाची सुरुवात चांगली केली. सलामीवीर रोहित शर्मा आणि क्विंटन डी-कॉक यांनी डावाची आक्रमक सुरुवात केली. दोघांनीही पहिल्या विकेटसाठी 52 धावांची भागीदारी केली. युजवेंद्र चहलने डी-कॉकचा त्रिफळा उडवत बंगळुरुला पहिला धक्का दिला. यानंतर सूर्यकुमार यादव आणि युवराज सिंह यांनी फटकेबाजी करत रोहित शर्माला चांगली साथ दिली. यामुळे मुंबईने आश्वासक धावसंख्या गाठली.
मात्र मोक्याच्या क्षणी बंगळुरुच्या गोलंदाजांनी विकेट काढत मुंबईला बॅकफूटवर ढकललं. त्यातच मुंबईच्या मधल्या फळीतल्या फलंदाजांनी आजच्या सामन्यात पुरती निराशा केली. कायरन पोलार्ड, हार्दिक पांड्या, मिचेल मॅक्लेनघन हे फलंदाज आज फारशी चमक दाखवू शकले नाहीत. बंगळुरुकडून युजवेंद्र चहलने मुंबईच्या डावाला खिंडार पाडलं. त्याने 4 बळी घेतले. त्याला उमेश यादव आणि मोहम्मद सिराजने चांगली साथ दिली.
Live Blog
लसिथ मलिंगाचा अखेरच्या षटकात भेदक मारा
बंगळुरुला पाचवा धक्का
एबी डिव्हीलियर्सने एका बाजूने लढा सुरु ठेवत आपलं अर्धशतक साजरं केलं. दरम्यान डिव्हीलियर्सने आयपीएलमध्ये 4 हजार धावांचा टप्पाही पूर्ण केला
बुमराहच्या गोलंदाजीवर पांड्याने घेतला झेल
टप्पा पडूस उसळी घेतलेल्या चेंडूवर फटका खेळण्याच्या प्रयत्नात कोहली हार्दिक पांड्याकडे झेल देत माघारी.
विराटचं अर्धशतक 4 धावांनी हुकलं
जसप्रीत बुमराहच्या गोलंदाजीवर 46 वी धाव काढत विराटने हा अनोखा विक्रम केला आहे.
अशी कामगिरी करणारा तो दुसरा फलंदाज ठरलाय
मयांक मार्कंडेच्या गोलंदाजीवर पार्थिव माघारी
मोईल अली चोरटी धाव घेताना धावबाद
बंगळुरुला सामना जिंकण्यासाठी 188 धावांची गरज
बंगळुरुला विजयासाठी 189 धावांचं आव्हान
मुंबईचा आठवा गडी माघारी
मोहम्मद सिराजने उडवला मॅक्लेनघनचा त्रिफळा
मोक्याच्या क्षणी बंगळुरुचं सामन्यात पुनरागमन
चहलकडून मुंबईच्या डावाला खिंडार
युजवेंद्र चहलच्या गोलंदाजीवर मोईन अलीने घेतला झेल
चहलच्या गोलंदाजीवर लागोपाठ 3 षटकार खेचत युवराजने आपले इरादे स्पष्ट केले, मात्र चौथा षटकार खेचत असताना युवराज मोहम्मद सिराजच्या हाती झेल देत माघारी
रोहितची धडाकेबाज खेळी, 33 चेंडूत 48 धावा
उमेश यादवच्या गोलंदाजीवर मोहम्मद सिराजने घेतला झेल
युजवेंद्र चहलच्या गोलंदाजीवर रिव्हर्स स्विपचा फटका खेळण्याच्या प्रयत्नात डी-कॉक त्रिफळाचीत होऊन माघारी
सलामीच्या जोडीसाठी दोघांमध्ये अर्धशतकी भागीदारी
घरच्या मैदानावर विराटच्या खेळाकडे सर्व चाहत्यांचं लक्ष
मुंबईच्या संघात दोन बदल, मयांक मार्कंडे आणि लसिथ मलिंगाला संघात स्थान