रोहितने पत्नीसोबत केला मजेदार प्रँक, घाबरलेल्या अवस्थेत दिसली रितिका; पाहा व्हायरल व्हिडीओ

मुंबई इंडियन्सच्या संघाला आयपीएलच्या उर्वरित पर्वामध्ये आपल्या नावाला साजेशी कामगिरी करता आलेली नाही. यंदा रोहित शर्माच्या नेतृत्वाखाली खेळणारा हा संघ जेतेपदापासून सध्या तरी फार दूर दिसत आहे. असं असलं तरी रोहित शर्मा त्याच्या संघ सहकाऱ्यांचा उत्साह वाढवण्यासाठी आणि त्यांना प्रोत्साहन देण्याचा प्रयत्न करताना दिसतोय. उरलेल्या दोन्ही सामन्यांमध्ये मोठे विजय मिळवून अंतिम चारमध्ये स्थान निश्चित करण्यासाठी रोहितचा संघ प्रयत्न करत आहे. गुणतालिकेमध्ये नेट रनरेट वाढला तरच मुंबईला चौथ्या स्थानापर्यंत झेप मारुन प्लेऑफसाठी जागा निश्चित करता येईल. सध्या मुंबई आणि पंजाब दोन्ही संघाचे प्रत्येकी १० अंक आहेत. एकीकडे या आकडेमोडीचं टेन्शन असतानाच दुसरीकडे रोहितने स्वत:च्या इन्स्टाग्रामवरुन एक मजेदार व्हिडीओ शेअर केलाय. या व्हिडीओ रोहित त्याच्या पत्नीला घाबरवणारा एक प्रँक करताना दिसतोय.

रोहितने आपल्या अधिकृत इन्स्टाग्राम हॅण्डलवरुन हा व्हिडीओ शेअर केलाय. या व्हिडीओमध्ये रोहितची पत्नी रितिका सजदेहसुद्धा दिसत आहे. व्हिडीओ रोहितच्या चाहत्यांना फारच आवडला आहे. या व्हिडीओमध्ये रोहित त्याच्या पत्नीला घाबरवताना दिसतोय. रोहितने स्वत:च हा व्हिडीओ शेअर केलाय. रोहित व्हिडीओच्या सुरुवातीला आपल्या डाव्या हातामध्ये चॉकलेट ठेवतो आणि मूठ झाकतो. त्यानंतर तो रितिकाजवळ जातो आणि तिला मूठ उघडण्यास सांगतो.

मात्र रोहितने हातामध्ये काहीतरी भयानक गोष्ट लपवल्याची भीती रितिकाला वाटते. रोहित तिला त्याच्या हाताची मूठ उघडण्यास सांगतो. तो तिला सांगतो की माझ्या हातामध्ये काय आहे उघडून बघ. मात्र रितिकाला भीती वाटते आणि रोहित पुढे येतो तशी ती मागे मागे सरकताना दिसते. रोहित तिला वारंवार मूठ उघडण्यास सांगत असतो. रोहित कॅमेराच्या मागून म्हणतो, “तुम्हाला वाटतंय का मी रितिकाला घाबरवतोय?, शप्पथ सांगतो केवळ एकदा माझ्या हाताला हात लाव.” अखेर रितिका घाबरतच रोहितच्या हातावर मारते आणि तो मूठ उघडतो तर हातात एक चॉकलेट दिसतं.

View this post on Instagram

A post shared by Rohit Sharma (@rohitsharma45)

मुंबई इंडियन्सच्या अधिकृत अकाऊंटवरुनही या व्हिडीओवर कमेंट करण्यात आलीय. आम्हाला प्रँकस्टर रोहित आवडला असं या कमेंटमध्ये म्हटलंय. सध्या हे दोघेही दुबईमध्ये आहेत. टी २० विश्वचषक स्पर्धा संपेपर्यंत हे दोघेही तिथेच असणार आहेत.