आयपीएल म्हटलं चौकार षटकारांचा पाऊस…फलंदाज गोलंदाजांना अक्षरश: सळो की पळो करून सोडतात. राजस्थान रॉयल्स विरुद्ध पंजाब किंग्जच्या सामन्यात चौकार षटकारांचा पाऊस पाहायला मिळाला. पंजाबच्या दीपक हुड्डाने यंदाच्या आयपीएलमधील वेगवान अर्धशतक झळकावलं.
पंजाबच्या दीपक हुड्डाने अवघ्या २० चेंडुत अर्धशतक पूर्ण केलं. या सामन्यात हुड्डाने २८ चेंडुंचा सामना करत ६४ धावा केल्या. त्याच्या खेळीत ४ चौकार आणि ६ षटकारांचा समावेश आहे. ख्रिस मॉरिसच्या चेंडुवर उंच फटका मारण्याच्या नादात रियान परागच्या हाती झेल देऊन बाद झाला. विशेष म्हणजे कर्णधार केएल राहुलसोबत त्याने २२ चेंडुत अर्धशतकी भागिदारी केली. त्याच्या आक्रमक खेळीनंतर पंजाब किंग्सने मजेशीर ट्वीट केलं आहे. ‘केएल: वानखेडे का गुंडा हू मै…..हुड्डा: मै भी’ असं कॅप्शन देत फोटो ट्वीट केला आहे.
KL: Wankhede ka gunda hu main
Hooda: Main bhi #SaddaPunjab #IPL2021 #PunjabKings #RRvPBKS pic.twitter.com/F97dDWZjN4— Punjab Kings (@PunjabKingsIPL) April 12, 2021
पंजाबचा कर्णधार केएल राहुल यानेही या सामन्यात चांगली खेळी केली. ५० चेंडुत ९१ धावांची खेळी केली. त्यात ५ षटकार आणि ७ चौकारांचा समावेश आहे. त्याचं शतक अवघ्या ९ धावांनी हुकलं. चेतनच्या गोलंदाजीवर उत्तुंग फटका मारताना सीमेवर राहुल तेवतियाने त्याचा झेल घेतला.
हुड्डा आणि केएल राहुलच्या दमदार खेळीमुळे पंजाबने ६ गडी गमवत २२१ धावांचा डोंगर रचला. या मोठ्या धावसंख्येमुळे पंजाबच्या गोलंदाजांवरील दडपण काही का होईना थोडं कमी झालं आहे.
