मुंबई इंडियन्सने इंडियन प्रीमियर लीग ( आयपीएल ) २०२४ साठी कर्णधार म्हणून हार्दिक पांड्या याचं नाव जाहीर केलं आहे. मुंबई इंडियन्सने अधिकृत पत्रक काढत ही घोषणा केली आहे. यामुळे रोहित शर्मा याच्या चाहत्यांना एकच धक्का बसला आहे. आता मुंबई इंडियन्सने ‘एक्स’ अकाउंटवर ( ट्वीटर ) रोहित शर्माबद्दल भावनिक व्हिडीओ शेअर करत पोस्ट लिहिली आहे.
अष्टपैलू हार्दिक पांड्याला मुंबईने नुकतंच गुजरात टायटन्सला १५ कोटी रूपये देऊन आपल्या ताफ्यात घेतलं होतं. आता रोहित शर्माच्या जागी कर्णधार म्हणून हार्दिक पांड्याची निवड करण्यात आली आहे. रोहित शर्मा १० वर्षे झालं मुंबई इंडियन्सचं नेतृत्व करतोय. त्याच्या नेतृत्वात मुंबईने सहा वेळा ‘आयपीएल’च्या चषकावर नाव कोरलं आहे.
हेही वाचा : रोहित शर्मा कर्णधार झाला आणि मुंबई इंडियन्सचं पालटलं नशीब
हार्दिक पांड्याची कर्णधारपदी निवड केल्यावर मुंबई इंडियन्सनं रोहित शर्माचा व्हिडीओ शेअर केला. त्यावर लिहिलं, “२४ एप्रिल २०१३ साली तू मुंबई इंडियन्सचा कर्णधार झाला. तू विश्वास ठेवायला शिकवले. पराभव असो किंवा विजय, तू नेहमीच हसत राहायचा.. १० वर्षात सहावेळा चषकावर आपण नाव कोरलं. तू नेहमीच आमचा कर्णधार राहशील… तुझा वारसा ‘ब्लू आणि गोल्ड’मध्ये कोरला जाईल… धन्यवाद रोहित…”
मुंबई इंडियन्सचे प्रशिक्षक महेला जयवर्धन यांनीही रोहित शर्माबाबत प्रतिक्रिया दिली आहे. ते म्हणाले, “भविष्याच्या दृष्टीनं हे एक मोठं पाऊल उचललं आहे. सचिन तेंडुलकर, हरभजन, सिंग, रिकी पाँटिंग ते रोहित शर्मासारख्या दिग्गजाचं नेतृत्व मुंबई इंडियन्सला लाभलं आहे. त्यांच्या नेतृत्वाखाली संघाने यशाचं शिखर गाठलं आहेत. आता भविष्याच्या दृष्टीनं संघाला मजबूत करण्यासाठी निर्णय घ्यावा लागत आहे. त्यामुळे हार्दिक पांड्याची कर्णधारपदी नियुक्ती करण्यात आली आहे.”
