IPL 2025 Retention Delhi Capitals Team Players: आयपीएल रिटेन्शनमधील सगळ्यात चर्चित नाव म्हणजे विकेटकीपर फलंदाज ऋषभ पंत. ऋषभची आयपीएल कारकीर्द या संघाच्या माध्यमातूनच उभी राहिली आहे. महेंद्रसिंग धोनीचा वारसदार या दृष्टीने पंतकडे पाहिलं जातं. जीवघेण्या अपघातातून सावरत दमदार पुनरागमन करणाऱ्या ऋषभने चाहत्यांची मने जिंकली आहेत. तडाखेबंद फटकेबाजी आणि उत्तम यष्टीरक्षण ही पंतची जमेची बाजू. या दोन्हीच्या बरोबरीने कर्णधारपदही भूषवत असल्याने ऋषभ हा आयपीएल मार्केटमधलं चलनी नाणं आहे. ऋषभला केंद्रस्थानी ठेऊनच अनेक वर्ष दिल्लीने संघरचना केली होती. मात्र आता दिल्ली संघव्यवस्थापनात मूलभूत बदल झाले आहेत. रिकी पॉन्टिंग, सौरव गांगुली यांच्याऐवजी हेमांग बदानी आणि वेणूगोपाळ राव यांनी कार्यभार स्वीकारला आहे. ऋषभने काही दिवसांपूर्वीच सोशल मीडियावर पोस्ट करून मला लिलावात किती रक्कम मिळेल असं म्हटलं होतं. त्यानंतर उलटसुलट चर्चांना उधाण आलं होतं. पंतसाठी अनेक संघ उत्सुक आहेत. ऋषभचं वय आणि क्षमता पाहता त्याच्यासारखा खेळाडू ताफ्यात असणं कोणत्याही संघासाठी फायदेशीर सौदा आहे. मात्र याकरता त्यांना प्रचंड मोठी रक्कम मोजावी लागेल. दिल्ली ऋषभला रिटेन करणार का हे पाहणं गुरुवारी उत्सुकतेचं ठरणार आहे. ऋषभला रिटेन केलं नाही तर दिल्ली अन्य कुठल्या खेळाडूंना ताफ्यात ठेवणार का पूर्णत: नव्याने संघबांधणी करणार याकडेही चाहत्यांचं लक्ष आहे.
हेही वाचा – KKR IPL 2025 Retention: जेतेपद मिळवून देणाऱ्याला कर्णधाराला केकेआर सोडणार?
कुलदीप यादव आणि अक्षर पटेल हे फिरकीपटू दिल्लीच्या भविष्यकालीन योजनांचा भाग असू शकतात. पृथ्वी शॉ यासाठी दिल्लीने बरीच मेहनत घेतली होती. ट्रिस्टन स्टब्स हा दक्षिण आफ्रिकेचा युवा खेळाडू दिल्लीसाठी उज्वल भविष्य असू शकतो. पंत दुखापतग्रस्त असताना अभिषेक पोरेलने आपल्या खेळाने छाप उमटवली होती. जेक फ्रेझर मॅकर्ग याने मनमुराद फटकेबाजीसह आपल्या नैपुण्याची चुणूक दाखवली होती. अँनरिक नॉर्किया हा चांगला वेगवान गोलंदाज दिल्लीकडे आहे. त्याला ताफ्यात ठेवण्याचा ते विचारू करू शकतात. मुकेश कुमारही त्यांच्या योजनांचा भाग असू शकतो.
