IPL 2025 Retention Kolkata Knight Riders Team Players: श्रेयस अय्यरच्या नेतृत्वात कोलकाता नाईट रायडर्स संघाने २०२४ हंगामाचं जेतेपद पटकावलं. प्रदीर्घ कालावधीनंतर कोलकाताचं जेतेपदाचं स्वप्न प्रत्यक्षात साकारलं. मेन्टॉर गौतम गंभीर, प्रशिक्षक चंद्रकांत पंडित यांच्यासह कर्णधार श्रेयस अय्यरचा या जेतेपदात महत्त्वाचा वाटा होता. कोलकाताचे जुनेजाणते योद्धे सुनील नरिन आणि आंद्रे रसेल यांनी फलंदाजी, गोलंदाजी आणि क्षेत्ररक्षण अशा तिन्ही आघाड्यांवर दमदार प्रदर्शन करत संघाच्या विजयाचा पाया रचला. रिंकू सिंग हा कोलकाता संघाचा नवा चेहरा आहे. गेल्या हंगामात गुजरातविरुद्ध शेवटच्या षटकात ५ षटकार खेचत रिंकूने कोलकाताला थरारक विजय मिळवून दिला होता. त्यामुळे रिंकू कोलकाताच्या भविष्यकालीन योजनांचा भाग आहे. वेंकटेश अय्यर, वरुण चक्रवर्ती, हर्षित राणा, फिल सॉल्ट यांच्याकडेही कोलकाताचं लक्ष आहे.
कोलकाताने याआधी गौतम गंभीरच्या नेतृत्वात २०१२ आणि २०१४ मध्ये जेतेपदावर नाव कोरलं आहे. गंभीर यांनी भारतीय संघाच्या प्रशिक्षकपदाची धुरा स्वीकारल्याने त्यांनी कोलकाताचं मेन्टॉरपद सोडलं. गंभीर यांच्या बरोबरीने कोलकाताच्या सपोर्ट स्टाफचा भाग असलेले अभिषेक नायर आणि रायन टेन डेस्काटा हेही भारताच्या कोचिंग टीमचा भाग झाले आहेत. यामुळे कोलकाताला संघाच्या बरोबरीने सपोर्ट स्टाफचीही नव्याने रचना करावी लागणार आहे.
