IPL 2025 : चेन्नई सुपर किंग्जसाठी आनंदाची बातमी! ‘या’ नियमामुळे महेंद्रसिंग धोनीला ठेवता येणार कायम

आयपीएल गव्हर्निंग कौन्सिलच्या प्रेस रिलीझमध्ये असे म्हटले आहे की, जर एखाद्या कॅप्ड भारतीय खेळाडूने संबंधित हंगामाच्या आधीच्या पाच कॅलेंडर वर्षांत आंतरराष्ट्रीय क्रिकेटच्या सुरुवातीच्या प्लेइंग इलेव्हनमध्ये (कसोटी सामना, एकदिवसीय, टी२० आंतरराष्ट्रीय) खेळला नसेल किंवा जर त्याचा बीसीसीआयशी केंद्रीय करार नसेल, तर तो अनकॅप्ड असेल. हा नियम फक्त भारतीय खेळाडूंना लागू असेल.

शेवटचा आंतरराष्ट्रीय सामना न्यूझीलंडविरुद्ध खेळला होता-

अनुभवी खेळाडू महेंद्रसिंग धोनीने भारतासाठी शेवटचा सामना जुलै २०१९ मध्ये न्यूझीलंडविरुद्ध खेळला होता. तेव्हापासून त्याला टीम इंडियाच्या प्लेइंग इलेव्हनमध्ये स्थान मिळालेले नाही. त्यानंतर १५ ऑगस्ट २०२० रोजी त्याने आंतरराष्ट्रीय क्रिकेटमधून निवृत्ती घेतली. त्यानंतर तो फक्त आयपीएलमध्ये खेळताना दिसत आहे. नियमांनुसार धोनी आता आयपीएल २०२५ मध्ये अनकॅप्ड खेळाडू म्हणून खेळू शकतो. यामुळे फ्रँचायझी त्याला कमी किमतीत आपल्याकडे ठेवू शकणार आहे.

हेही वाचा – IPL 2025: BCCI चा ऐतिहासिक निर्णय, IPL मध्ये खेळाडूंना मॅच फी म्हणून मिळणार ७.०५ लाख, तर सर्व सामने खेळण्यासाठी मिळणार कोट्यवधी रूपये

चेन्नई सुपर किंग्ज संघाने पाच विजेतेपद पटकावले –

महेंद्रसिंग धोनीची गणना महान कर्णधारांमध्ये केली जाते. त्याने आपल्या शांत आणि हुशारीने चेन्नई सुपर किंग्जला अनेक सामने जिंकून दिले आहेत. धोनीच्या नेतृत्वाखाली सीएसके संघाने पाच वेळा (२०१०, २०११, २०१८, २०२१ आणि २०२३) आयपीएल विजेतेपद पटकावले. आयपीएलमधील दोन मोसमात तो रायझिंग पुणे सुपरजायंट्सकडूनही खेळला आहे. आयपीएलमध्ये त्याला पाहण्यासाठी चाहते खासकरून स्टेडियममध्ये पोहोचतात. तो २००८ पासून आयपीएलमध्ये खेळत आहे आणि त्याने आतापर्यंत एकूण २६४ सामने खेळले आहेत, ज्यामध्ये त्याने ५२४३ धावा केल्या आहेत. या काळात त्याची सर्वोच्च धावसंख्या ८४ धावा आहे. धोनीने आयपीएलमध्ये २४ अर्धशतकेही झळकावली आहेत.