IPL 2025 Retention Sunrisers Hyderabad Team Players: ऑस्ट्रेलियाचा कर्णधार पॅट कमिन्सने नेतृत्वाची धुरा हाती घेतल्यापासून सनरायझर्स हैदराबाद प्रचंड आक्रमक पवित्र्याने खेळत आहे. ट्रॅव्हिस हेड, हेनरिच क्लासन आणि अभिषेक शर्मा यांनी अक्षरक्ष: धुमाकूळ घातला आहे. कमीत कमी चेंडू जास्तीत जास्त धावा चोपण्यात हे त्रिकुट माहीर आहे. कमिन्स, क्लासन आणि अभिषेक शर्मा यांना रिटेन केलं जाण्याची शक्यता आहे. ट्रॅव्हिस हेडसाठी राईट टू मॅच कार्डाचा वापर केला जाऊ शकतो. हैदराबादकडे भुवनेश्वर कुमारसारखा अनुभवी गोलंदाज आहे. त्याच्यासाठीही राईट टू मॅच कार्डाचा उपयोग केला जाऊ शकतो. माजी कर्णधार एडन मारक्रमचं काय होणार याकडे चाहत्यांचं लक्ष आहे. मारक्रमच्या नेतृत्वातच SA T20 स्पर्धेत हैदराबाद संघाचे मालक असलेल्या संघानेच जेतेपदाची कमाई केली होती.
२०१६ मध्ये डेव्हिड वॉर्नरच्या नेतृत्वात सनरायझर्स हैदराबादने जेतेपदावर नाव कोरलं होतं. अगदी आतापर्यंत वॉर्नर सनरायझर्सचा अविभाज्य भाग होता. मात्र वॉर्नर आणि सनरायझर्स यांच्यात वितुष्ट आल्याने सगळंच चित्र पालटलं. हैदराबाद संघाने वॉर्नरला सोडचिठ्ठी दिली. यानंतर पॅट कमिन्सकडे सूत्रं आली. त्याने संघाचा दृष्टिकोनच बदलून टाकला. हेड-क्लासन-अभिषेक या त्रिकुटाने कमिन्सचे शब्द प्रत्यक्षात उतरवले. हैदराबादने सातत्याने असा खेळ केल्यास जेतेपद त्यांच्यासाठी अशक्य नाही.
