इतिश्रीनिवासन !

* भारताकडून आयसीसीला प्रतिनिधीत्व करायला मिळावे मागण्या मान्य झाल्यास कार्यकारिणीच्या बैठकीत राजीनामा देण्यास तयार
बीसीसीआयच्या काही पदाधिकाऱ्यांनी दिलेला राजीनामा आणि वरिष्ठ अधिकाऱ्यांनी दिलेल्या राजीनाम्याच्या धमकीमुळे आयपीएलमधील स्पॉट-फिक्सिंग प्रकरणाची चौकशी पूर्ण होईपर्यंत अखेर एन. श्रीनिवासन यांनी अध्यक्षपदाचा त्याग करण्याचे मान्य केले खरे, पण त्यामध्येही आपली हटवादी भूमिका ठाम ठेवत तीन मागण्या ठेवलेल्या आहे. दरम्यान, राजीव शुक्ला यांनी आयपीएलच्या प्रमुखपदाचा राजीनमा दिल्याने श्रीनिवासन यांच्या चिंतेत अजूनच भर पडलेली आहे. रविवारी बीसीसीआयच्या कार्यकारिणीच्या बैठकीमध्ये श्रीनिवासन पदत्यागाचा निर्णय घेण्याची दाट शक्यता आहे. त्यामुळे श्रीनिवासन खरेच राजीनामा देणार का आणि राजीनामा दिल्यावर त्यांचे काय होणार ? हीच चर्चा सर्वत्र आहे.
राजीनामाच्या चारही बाजूंनी मागण्या होत असल्या तरी ते डगमगले नाहीत, उलटपक्षी प्रत्येकाचा त्यांनी समाचार घेतला, बीसीसीआयमधील दोन पदाधिकाऱ्यांनी राजीनामा दिला तरी त्यावर त्यांनी कोणतीच प्रतिक्रिया दिली नाही, पण आता अजून काही बीसीसीआयचे पदाधिकारी राजीनाम्या देण्याच्या तयारीत असल्याने श्रीनिवासन यांचे धाबे दणाणले असल्याची माहिती सूत्रांनी दिली आहे. त्यामुळे रविवारी होणाऱ्या बीसीसीआयच्या कार्यकारिणीच्या बैठकीमध्ये ते राजीनामा देण्याची शक्यता वर्तवण्यात येत आहे.
बीसीसीआयच्या सूत्रांनी दिलेल्या माहितीनुसार, काही अधिकाऱ्यांनी तुम्ही राजीनामा द्या नाही तर आम्ही राजीनामा देतो, असा पवित्रा घेतला आहे. त्यामुळे श्रीनिवासन अडचणीत सापडले असून यामधून बाहेर पडण्याचा मार्ग ते शोधत आहेत.
येत्या २४ तासांमध्ये मोठी बातमी झळकेल, असा गर्भित इशारा बीसीसीआयचे उपाध्यक्ष अरुण जेटली आणि संयुक्त सचिव अनुराग ठाकूर यांनी दिला आहे. या सर्व घडामोडींच्या पाश्र्वभूमीवर श्रीनिवासन बैठकीत राजीनामा देणार असल्याची चर्चा आहे.
एक दिवस थांबा, मोठी घडामोड तुम्हाला पाहायला मिळेल. थोडासा संयम बाळगा, भारतीय क्रिकेटची प्रतिमा सुधारण्यासाठी आम्ही काही पावले उचलणार आहोत. पोलिसांची या प्रकरणी कारवाई सुरू आहे, त्यामुळे आता थोडासा संयम बाळगणे गरजेचे आहे, असे संयुक्त सचिव अनुराग ठाकूर यांनी सांगितले.
शुक्रवारी श्रीनिवासन यांच्या हटवादी भूमिकेला कंटाळून सचिव संजय जगदाळे आणि कोषाध्यक्ष अजय शिर्के यांनी आपल्या पदांचा राजीनामा दिला होता. पण या गोष्टीचा कोणताच परिणाम श्रीनिवासन यांच्यावर झाला नाही. तरी त्यानंतर आपल्या विरोधकांची संख्या पाहून त्यांनी नमते घेतल्याचे चित्र पाहायला मिळत आहे. श्रीनिवासन यांचा र्कायकारिणी बैठकीलाही विरोध होता. पण आयसीसीने त्यांचा जावई गुरुनाथ मैयप्पनला सट्टेबाजीपासून दूर राहण्याची ताकीद दिल्याचे समजताच त्यांनी बैठकीला मंजूरी दिली.
बीसीसीआयच्या बैठकीची वेळ बदलली
एन. श्रीनिवासन यांच्या राजीनाम्याच्या मागणीसाठी बीसीसीआयच्या कार्यकारिणी समितीने बैठक बोलावली असून या बैठकीची वेळ बदलण्यात आली आहे. सुरुवातीला ही बैठक सकाळी ११ वाजता होईल, असे सांगितले जात होते, पण काही तासांनी ही बैठक दुपारी २.३० मिनिटांनी होणार असल्याचे कळवण्यात आले. या बैठकीमध्ये श्रीनिवासन यांच्या राजीनाम्याची मागणी पदाधिकारी करणार असल्याचे चित्र आहे. बीसीसीआयच्या कार्यकारिणी समितीची बैठक रविवारी, २ जूनला दुपारी २.३० मिनिटांनी चेन्नईतील पार्क शेरेटॉनमध्ये होणार आहे, अशी माहिती बीसीसीआयचे संयुक्त सचिव अनुराग ठाकूर यांनी दिली.
राजीनामा देणार, पण..
चेन्नई : सहजासहजी राजीनामा देतील ते श्रीनिवासन कसले पण आता राजीनाम्याचा फास आवळला गेला असला तरी ‘मी राजीनामा देईन, पण माझ्या तीन मागण्या मान्य व्हायला हव्यात’ असा पवित्रा त्यांनी घेतला आहे. रविवारच्या कार्यकारिणीच्या बैठकीमध्ये जोपर्यंत चौकशी पूर्ण होत नाही तोपर्यंत पदत्याग करण्याचा निर्णय श्रीनिवासन घेतील, अशी दाट शक्यता आहे.
श्रीनिवासन यांनी सर्व बाजूंनी विचार करत आपल्या तीन मागण्या केल्या आहेत. जर निर्दोष असेन तर अध्यक्षपदी पुन्हा नियुक्ती करण्यात यावी, ही त्यांची पहिली मागणी आहे. तर शुक्रवारी राजीनामा देणारे सचिव संजय जगदाळे आणि कोषाध्यक्ष अजय शिर्के यांना नवीन कार्यकारिणीतून वगळण्यात यावे, ही त्यांची दुसरी मागणी असून भारताकडून आयसीसीला प्रतिनिधीत्व करायला मिळावे, ही त्यांनी तिसरी मागणी केली आहे.